Хави 2016 йилда ўзбек клубларига қарши ўйнаши мумкин

Фаолиятини тўлиқ каталонияликларга бағшида этган Хави, у ерда 25 йил давомида тўп тепди. 35ни қарши олган ярим ҳимоячини "Ал Садд"га  ўтиши ҳақидаги гаплар анча аввал чиққан бўлишига қарамай, кўпчилик уни инкор этиб келаётган эди. Матбуот анжуманида футболчи барчаси рост эканлигини тасдиқлади.



"Шуни маълум қиламанки, мен "Барселона"дан кетяпман. Ҳаётимнинг 25 йилини шу клубга бағишладим. Аслида яна бир йил қолсам бўлар эди, лекин ўйнаб қолай деяпман. 2014/15 йилги мавсумни ҳам "Барселона"да якунлаётганимни ўзи катта бахт. Биз ўз олдимизга қўйган учта вазифадан биттасини бажардик, яна иккита финал арафасида турибмиз", - дейди жаҳон чемпиони.

Йилдан йилга футболи олдинга қараб кетаётган Қатар ҳақида у шундай дейди:
- Қатар менга жуда катта лойиҳа билан чиқди. Аввалига у ерда икки мавсум  "Ал Садд" шарафини ҳимоя қиламан, шундан кейин жамоа бошқарувига ўтишим керак. Қолаверса "Эспайр" (Aspire academy) академиясининг равнақи йўли ва Қатарда бўлиб ўтадиган ЖЧ-2022 учун мезбонларнинг вакили сифатида ишлайман. Қисқаси улар мен учун ҳар томонлама қулай бўлган шартномани таклиф қилдилар.

"Барселона"даги ҳаётидан тўлиқ қаноат ҳосил қилган футболчи, у ердан кетиш осон бўлмаётганлигини қайд этди.
-  Мен бу ерда ҳар қандай футболчи орзу қилиши мумкин бўлган ютуқларга эришдим. Жаҳоннинг энг яхши футболчилари билан бирга фаолият олиб бордим. Тўғри, ҳали "Ал Садд" билан расмий шартномага эга эмасман, балки "Барселона"да қоларман, лекин тўғрисини айтганда, ўзим учун идеал бўлган шартномани қўлимга тутrазишди.



30 май куни "Барселона" Хавининг сардорлигида Испания Кубогининг финалида Билбаонинг "Атлетик" ва 6 июнь куни эса ЕЧЛ финалида "Ювентус"га қарши майдонга тушишга яқин турибди.
"Бу икки финал "Барселона"даги эртагимнинг ажойиб интиҳоси бўлар эди", - дейди Хави матбуот анжумани сўнггида.

2016 йилги мавсумда ОФК чемпионлар лигаси саралаш ўйинларининг иккинчи босқичидан курашга қўшиладиган "Ал Садд", бу босқичдан ўта олса, сўнгги саралаш ўйинларида Ўзбекистон чемпионатида учинчи (агар кубок ғолиби учликка кирган бўлса тўртинчи) ўрин эгасига қарши ўйнаши мумкин бўлади. "Ал Садд" гуруҳ ўйинлари йўлламасини қўлга киритадиган бўлса, мазкур босқичда иштирок этадиган 3та жамоамиз билан бир гуруҳдан жой олиши мумкин бўлади.

Эслатиб ўтамиз, 2015 йилги мавсумда плей офф босқичидан гуруҳ ўйинларига қўшилган "Ал Садд" 1/8 финалда "Лахвия"га қарши биринчи ўйинини ўтказиб, 1:2 ҳисобида имкониятни бой берди.