Владо Радманович: "Бугун икки хил тайм кўрдик. Иккинчи бўлимда имкониятларимиздан фойдаландик ва ғалаба қозондик"

- Жаноб мураббий, бугунги учрашув ҳақидаги фикрларингиз?

- Бош мураббийимиз Сречко Катанец оилавий муаммоларга кўра уйига жўнаб кетди. Ўйинга келадиган бўлсак, бугун икки хил тайм кўрдик. Биринчи таймда бироз қийналдик, иккинчи таймда эса имкониятларимиздан фойдаландик ва ғалаба қозондик.

- Элдор Шомуродовнинг бугунги учрашув борасидаги фикрлари қандай?

- Мураббийимиз айтиб ўтганидек, бугун икки хил ўйин намойиш этдик. Биринчи бўлимда агрессивроқ ўйнашимиз керак эди. Иккинчи таймда эса ўйинимизни анча яхшилаб олдик ва иккита гол уриб ғалаба қозондик.

- Жаноб Радманович, бугунги учрашувда 70-дақиқадан сўнг чарчоқ ҳолати сезилди. Катанец айтиб ўтганидек, бизнинг асосий муаммомиз бу жисмоний ҳолатимиз. Буни тўғрилаш учун нималар қилишимиз керак?

- Сизга саволим бор, сиз футбол ўйнаганмисиз. Футбол ўйнаган бўлсангиз, сиз ушбу ҳолатни жуда яхши тушунасиз. Бундай мусобақаларда, қисқа вақт ичида 3-4 учрашув ўтказишимиз керак бўлади. Қайта тикланиш ҳар доим қийин кечади. Ҳаво ҳам бизга анча қийинчилик туғдирмоқда. Бундай иссиқда нафас олиш ҳам қийин. Шу сабабдан, биз кўп ўйинчиларни алмаштирдик ва шундай шароитга мослашган ҳолда таркиб ва услуб танладик.

- Ҳусановнинг ўйинига баҳо бериб ўтсангиз?

- Биз Ҳусановни анча вақтдан бери кузатиб борамиз. Абдуқодир ўзбек футболининг келажаги. У ҳали жуда ёш ва жуда маҳоратли. Менинг фикримча, у ҳали терма жамоага кўп ёрдам беради. Файзуллаев ҳам жуда иқтидорли ва келажаги порлоқ. Кейинги учрашувларда Файзуллаевга имконият берамиз ва у ўзини яхши томонлама кўрсатишига ишонаман. Биз U-20 терма жамоасидан кўп футболчиларни кузатиб бормоқдамиз, лекин уларнинг барчасини ҳам терма жамоага жалб этишга имкониятимиз йўқ.

- Элдор, бугун "дубль" қайд этиб, Ўзбекистон терма жамоаси тарихидаги энг яхши тўпурарга айландингиз. Тарихий натижа қайд этганингиздан сўнг, ҳиссиётларингиз билан бўлишсангиз?

- Тарихий натижага эришиш ҳар доим ёқимли. Кўп маротаба айтиб ўтганимдек, асосий мақсадим жамоага фойда келтириш. Кейинги учрашувларда ҳам жамоамга кўпроқ ёрдам беришга ҳаракат қиламан.

- Элдор, кейинги босқич йўлланмасини ҳал этиб бўлинди. Кейинги учрашув қандай тайёргарлик кўрасизлар?

- Кейинги учрашувда қандай таркиб бўлишини мураббийлар ҳал қилади. Кейинги босқичга йўл олганимизга қарамай, гуруҳ босқичида яна битта ўйин бор. Тожикистон билан бўладиган ўйин орқали Эронга қарши учрашувга тайёргарлик кўрамиз.

- Терма жамоага қўшилиш муаммо туғдирмадими, сабаби сиз чет элда фаолият олиб борасиз ва ушбу йиғинга кўп янги футболчилар жалб этилди.

- Йигитлар билан анча вақтдан бери бирга ўйнаб келмоқдамиз. Биринчи таймда бироз тушунмовчиликлар бўлди, лекин иккинчи таймда ҳаммаси жойига тушди. Бундай ҳолатлар бўлиб туради, сабаби ҳар доим бир таркиб билан ўйнашнинг иложи йўқ. Ўйинчилар алмашиб, ротацияга қўл уриб ҳам туриш керак, сабаби олдинда Осиё кубоги бор.

- Бугун таркибда ва ўйин давомида кўп ўзгаришлар бўлди. Бугунги қарорларни сиз қабул қилдингизми ёки Катанец?

- Қарорларни бирга қабул қилдик.