Виталий Левченко: "Норчаев "Навбаҳор" билан ўйингача ҳам қайтмаса керак"

Ўйин ҳақида

- Ўйин дерби мақомига хос ўтди. Кўпроқ Европа футболида шунақа оловли дербилар бўлади. Мухлисларга раҳмат, бутун учрашув давомида бизни жуда яхши қўллаб-қувватлашди. Бугун ҳар икки жамоа мухлислари ҳақиқий футбол байрамини ташкил этиб беришди. 0:2 ҳисобини 2:2 кўринишига айлантира олдик, йигитларга характер учун рахмат айтаман.

- Иккинчи бўлимда тезкор футбол намойиш этишни мақсад қилганмидингиз?

- Биринчи бўлимда олдинги чизиқда Нсунгусу Эфионг ҳаракат қилди. Иккинчи бўлимда вазиятни ўзгартирдик. "Андижон" сафида турли нуқталарда ўйнай оладиган футболчиларга қарши услуб кўрсатишимиз шарт эди. Кўрганингиздек, иккинчи бўлимда тезкорликка урғу қаратдик, чунки ҳисоб ҳам тезликни талаб этаётганди.

 - Манучеҳр Сафаровнинг ўйинларидан қониқиш ҳосил қилаяпсизми?

- Сафаров терма жамоада ҳам катта босим билан ўйнайди. Бундан ташқари Жасур Жалолиддиновда ҳам шундай вазифа бор. Уларда чарчоқ аломатлари мавжуд.

- Норчаев нега ўйин қайдномасига киритилмади?

- Унда жароҳат бор. Терма жамоадан қайтганидан сўнг кўрикдан ўтди ва жароҳати бор эканлиги маълум бўлди. Тезроқ сафимизга қўшилишига умид қилаяпмиз.

- "Навбаҳор" билан ўйингача сафга қайтиши мумкинми?

- Менимча йўқ. Чунки Хусайнга тикланиб олиши учун бир оз вақт керак. Футболчининг соғлиги билан таваккал қила олмаймиз.