Виталий Левченко: "Биз ҳозир бир маҳоратли дарвозабон трансфери устида ишлаяпмиз"

Сайтимиз мухбири мазкур чатда қатнашиб, бош мураббийнинг фикрларидан бир нечта иқтибосларни ёзиб олди. Қуйида ушбу иқтибосларнинг айримлари келтириб ўтилмоқда.

- "Динамо" билан ўйинда асосан ёшлар жамоаларимиз таркибидан жалб этилган ёш футболчиларни кўрикдан ўтказдик.

- Мамасидиқов "Навбаҳор" таркибига қўшилгани ҳақида ўқидим. Жалолиддинов ҳозирда "Олимпик" йиғинида иштирок этаяпти.

- Биз ҳозир даражаси юқори бўлган, сифатли футбол намойиш этадиган яна бир ҳужумчи варианти устида ишлаяпмиз.

- Ҳар бир чизиққа бўйдор футболчилар билан ҳам тўлдириш мақсадимиз бор. Ҳимоя, ярим ҳимоя ва ҳужумда бўйдор футболчилар бўлади албатта. Биз ҳозир ўрганаяпмиз, таклиф этилган футболчи бизнинг ўйин фалсафамизга ҳам тушиши керак.

- Рустам Ятимовга хориж клубларидан қизиқиш бўлган. Россия чемпионатидан "Ростов" таклиф юборган. "Истиқлол" дарвозабон учун анчагина катта тўлов сўрамоқда.

- Биз ҳозир ўз қарашларимизга мос келган маҳоратли дарвозабон билан музокара ўтказаяпмиз. Келишувга эришсак, жамоамиз сафига қўшилади. Бу дарвозабон Ятимов эмаслиги аниқ.

- Манучеҳр Сафаров халқаро ўйинлар тажрибасига эга футболчи. У фарғоналик мухлисларга ҳар ўйинда қувонч тақдим этишига умид қилаяпмиз.

- Бизга таклиф этилган футболчини жамоа мураббийлар штаби томонидан ўрганиб чиқилади. Ҳар томонлама ўйлаб кўриб, кейин қарор чиқарамиз ва раҳбариятга таклиф киритамиз.

- Энг яхши мураббий танлови бутун жамоаники. Хусусан, фарғоналик мухлисларнинг ҳам ушбу эътирофда алоҳида ҳиссаси бор.

Бекзод Толибов ёзиб олди