Виталий Левченко: "Бир очко қўлга киритдик. Бундан хурсандмиз"

- Яхши ўйин бўлди. Иккита яхши даражадаги жамоалар тўқнаш келди. Бизга гол урилган вақтда бироз эътибор ва концентрация етишмади. Дастлабки гол урилган вазиятда рақиблар бу тариқа стандартдан фойдаланишини кутмагандик. Яна бироз диққатни йўқотиб, иккинчи голни ҳам қабул қилиб олдик. Бу вазиятдан чиқиб кетиш жуда қийин бўлди. Турнир жадвалида етакчи бўлиб тургандик. Бундай пайтда рақиблар икки карра юқори кайфиятда, ўзининг энг яхши ўйинини кўрсатиш учун ўйнайди. Йигитлардан мамнунман, улар характер кўрсата олишди. Ўз навбатида бизни қўллаб-қувватлаб ҳужумга ундагани учун мухлисларга ҳам раҳмат айтаман. Менимча 2:2 ҳисобидаги дуранг адолатли натижа бўлди.

- Бугун "Нефтчи"га "Пахтакор" ёки "Металлург" билан ўйиндаги шижоат етишмади.

- Сир эмас ҳозир рамазон ойи. Йигитларнинг организмида янгиланиш жараёни бўлмоқда. Балки шу сабабдан ҳам улардан кўп нарсани талаб қилиб бўлмаяпти. Шу сабабли уларда ўша ўйинлардагичалик катта куч ва иштиёқ йўқ деб ўйлайман. 

- Ҳисоб тенглашганидан кейин Акбар Тўраев вақтни чўзишга ҳаракат қилди.

- Йўқ. Биз ўз майдонимизда ўйнадик, мухлисларимизга ғалабани тортиқ қилмоқчи бўлдик. Сизга шундай кўринган бўлиши мумкин. Бутсалар бир-бирига тўқнашгандан кейин у жамоадошининг ўзига келиб олиши учун бироз тўпни ушлаб тургандир. Вақт чўзди деган фикрга қўшилмайман. Чунки биз ғалаба қозонишни истадик. 

- "Нефтчи" бир очко олдими ёки икки очко йўқотдими.

- Ўйиндан келиб чиқсак, биз бир очко олдик. Ўйин қийин ўтди. Бир очкодан хурсандмиз.