Виктор Херманс: "Ҳакамлик ёмон бўлди, лекин Ўзбекистонни табриклайман"

“Бугунги учрашувда финални кўзлаб майдонга тушгандик. Таркибни алмаштириб ўйнадик, уларни финалга чарчаб қолишмасин дегандик. Ўзбекистонни финалга чиққани билан табриклайман. Аммо ҳакамлик жуда ёмон бўлди. Бу мусобақа кутилмаган натижаларга бой бўлмоқда. Осиёда футзал ривожланиб бормоқда. Бироқ ҳакамлик бунга мос бўлмаяпти, ёнимиздаги ҳакам умуман ҳуштак чалмади. Фақат биз хато қилгандек бўлиб чиқдик. Қайтараман, Ўзбекистон учун хурсандман”, - дейди Херманс.

- Хосе Мария Мендезнинг Таиланд терма жамоасини яхши билиши натижага таъсир қилдими?
- У Таиландга 2012 йилда келганида терма жамоа янги тузилганди. “Чонбури”да ишлаганида терма жамоанинг деярли барча футзалчилари бу клубда ўйнарди. Мен 8та мамлакатда ишлаганман. Пулпис ҳам буни биларди.

- Балки Таиланд терма жамоаси асосий вақтда дурангдан кўра ғалабага ҳақлироқмиди?
- Йўқ бугун тенг ўйин бўлди. Фақатгина рақиб ўйновчи дарвозабонни туширгани учун гол уриб дуранг қайд этди.

- Ўзбекистон Супхавутни ўйиндан чиқариб қўйди. Бу ўйинга қанчалик таъсир қилди?
- Уни ҳеч ким ўйиндан чиқаргани йўқ деб ўйлайман. Супхавут Ўзбекистон терма жамоасида бўлганида жуда ҳам ёрдам берган бўларди. У таиландлик.

- Ўзбекистон терма жамоаси ҳақида қандай хулосаларингиз бор?
- Бу ерга Ўзбекистон ҳақида гапириш учун келмадим. Узр бу саволга жавоб бера олмайман.