Виктор Кумиков: "Исталган рақиб билан ўйинда ютишимизга ишонаман"

"Майдонга чиққан барча футболчилар берилган кўрсатмаларни тўлиқ бажаришди. Дастлабки 5-10 дақиқа бироз саросимали ўтди. Голдан сўнг ишонч янада ортди. Тактик томондан кураш кечди. Қарши ҳужумда яна голлар уришимиз мумкин эди. Ҳозирча иккинчи рақам остида ўйнашга мажбурмиз. Машғулотлар, йиғинлар орқали ўйинимизни яхшилаш устида янада кўпроқ ишлаймиз", – дейди Виктор Кумиков.

- "Пахтакор"ни ютишга шахсан ўзингиз ишонганмидингиз?

- Албатта. Исталган рақиб билан ўйинда ғалаба қозонишимизга ишонаман. Агарда мен ишонмасам ким ишонади? Биз рақибларимизни ўрганамиз. Тўғри, "Пахтакор"нинг таркиби бизникидан кучли. Терма жамоа футболчилари кўпчиликни ташкил қилади. Футболда ютиш ёки ютқазиш, дуранг ўйнаш мумкин.

- Сизнинг томонингизга кўп танқидлар ёғилганди. Сиз буларни оғир-босиқлик билан қабул қилдингиз...

- Мен жамоага келишим билан чемпионат баҳслари бошланиб кетди. Йиғинлар ташкил қилишга вақт бўлгани йўқ. Фақат ўйинлар орқали тайёрланишимиз мумкин.