Вальехо "Қироллик клуби"га муносиб эканлигини исботламоқчи

Марказий ҳимоячи мавсумлар оралиғида пойтахт жамоасига келиб қўшилганди. Чемпионат бошланиб улгурмай, Хесус Вальехо жароҳат олди ва уч ҳафтани майдон ташқарисида ўтказиши маълум қилинди. Бироқ у тўлиқ соғайиб сафга қайтишига унданда кўпроқ вақт керак бўлди. Чап оёқ мушакларини шикастлаб олган футболчи анча вақтгача индивидуал тарзда шуғулланишга мажбур бўлди ва шу сабаб, жамоанинг ўйин учун қайдномаларига ҳам киритилмади.

Испанияга катта умидлар билан қайтган футболчи фаолиятининг қийин дамларини бошдан ўтказмоқда.

Олдинда Хесус учун икки ҳафтадан камроқ вақт бор. Терма жамоалар ўйинлари сабаб юзага келган танаффусда у ўзининг оптимал формасига кириб олишга уринади. Бунда у Испания U-21 ёшлар термасига, ёшлар ўртасидаги Европа чемпионати-2019 саралаши доирасида Словакияга қарши ўйинга чақирув олгани яхши янгилик.

Буларнинг барчасига қарамай, Вальехо тушкунликка тушгани йўқ ва ҳамон жамоа бош мураббийи Зинедин Зиданга ўз имкониятларини кўрсатмоқчи, ҳамда жамоага кераклигини исботламоқчи.

Ҳимоячиларнинг бир нечтаси жароҳат сабаб сафдан чиққанини инобатга олсак, Хесус Вальехони яқин орада майдонда кўрсак ажаб эмас.