Усмон Тошев: "Ўйинни ўз назоратимиз остида олиб бордик"

Урганчдаги беллашувдан сўнг андижонликлар устози Усмон Тошев ўйин ҳақидаги таассуротлари билан ўртоқлашди.

- Биз жуда қийин шароитда ўйнадик. Майдоннинг сифати ҳам футбол ўйнаш учун етарли даражада талабга жавоб бермасди. Лекин биз ўйинга яхши тайёрлангандик. Футболчиларни ҳам учрашувга ҳар томонлама пухта тайёрлай олдик. Биринчи бўлимдан кейин 2:0 ҳисобида олдинда эдик.

Умуман олганда, ёмон ўйнамадик. Шунчаки, майдоннинг сифати ўйинимизга бироз таъсир қилди. Ўз дарвозамиздан тўп ўтказиб юборганимиздан кейин йигитларимиз озгина асабийлашишди. Аммо ҳисоб 1:2 бўлгандан сўнг йигитларимизда ваҳима кузатилмади. Ана энди ҳисоб тенглашиб қолиши мумкин деган хадик ҳеч бир йигитимизда кузатилмади. Ўйинни ўз назоратимиз остида олиб бордик. Рақиб дарвозасига учинчи голни ҳам уришимиз мумкин эди.

Умуман, ғалаба қозонганимиздан хурсандмиз. Тўғри, хатоларимиз бор. Аммо муҳими ўйинимиз бор. Футболчиларимизда ҳам ўзига бўлган ишонч бор. Айниқса, уларнинг руҳий ҳолати жуда яхши. Мен ўйлайманки, бунинг таъсири албатта “Орол” билан учрашувда ҳам сезилади. Бироқ Нукусдаги ўйин янада қийин бўлади. Чунки биз у ерда сунъий майдонда ўйнаймиз. Нима бўлганда ҳам биз ушбу беллашувга тайёрланамиз, - дейди Тошев.

"Андижон" матбуот хизмати.