Умид Аҳмаджонов ҳамда махсус ишчи гуруҳнинг Қарши шаҳрига ташрифи давом этмоқда

Умид Аҳмаджонов у ерда спортчилар учун яратилган шароитлар, уларнинг овқатланиш рациони, ётоқхонаси, спорт иншоотлари, машғулотлар майдонларини кўздан кечирди.

Жумладан, Умид Аҳмаджонов спортчиларнинг овқатланиш тизимини танқид остига олиб, спортчилар жисмонан бақувват бўлишлари учун калорияси кўпроқ овқатлар берилиши кераклигини таъкидлаб ўтди. Бу борада махсус кўрсатмалар берди.

Қарши шаҳар Олимпия захиралари ихтисослаштирилган мактаб интернатида янги барпо этилган, ўлчами 50 метрга 25 метр (50х25) бўлган сузиш ҳавзаси билан ҳам яқиндан танишилди.

Умид Аҳмаджонов спорт мутасаддилари билан суҳбатлашар экан, Давлатимиз раҳбари томонидан Олимпия захиралари коллежларининг самарали ишлаши учун миллиардлаб маблағ ажратилаётганини, ушбу маблағларнинг мақсадли сарфланишини жиддий назорат қилиш ҳамда уларни тўғри йўналтириш барча учун бирдек муҳим ва аҳамиятли мажбурият эканини таъкидлади.

Зеро, Ўзбекистон футбол ассоциацияси 1-вице Президенти айтганидек, “Миллий олимпия қўмитаси юритаётган сиёсат, олиб бораётган ислоҳотларга кўра юртимиздаги Олимпия захиралари коллежлари терма жамоаларимиз учун асосий база сифатида хизмат қилиши керак".

Умид Аҳмаджонов “Насаф” клубининг инфратузилмасини кўздан кечирди

ЎФА 1-вице-президенти бошчилигидаги ишчи гуруҳ “Насаф” клубининг уй стадиони бўлган “Марказий” ўйингоҳи, “Насаф” футбол академияси, “Насаф” футбол клубининг машғулотлар базаси ташриф буюрди. Ташриф давомида Умид Аҳмаджонов “Насаф” клуби раҳбарияти билан учрашиб,  ҳозирги кунда клубда мавжуд муаммоларни муҳокама қилди.

“Насаф” клуби футболчилари ва академияда таҳсил олаётган ёш футболчиларга яратилаётган шарт-шароитлар, стадионнинг аҳволи, машқ майдонлари ҳамда академия биносидаги вазиятни кўздан кечириб, камчиликларни бартараф этиш борасида зарур маслаҳатларни берди.

Умид Аҳмаджонов “Насаф” клубидаги молиявий муаммолар тез орада бартараф этилишини, клуб оддий ходимидан тортиб раҳбариятгача барча ойлик маошларини тўлиқ олишларини таъминлашга ваъда бериб, бу масалани ҳал қилиш учун охиригача боришини айтиб ўтди. “Насаф” клуби Қашқадарё футболининг юраги эканини, ҳамда бу клуб иштирокисиз Суперлига ўйинларини тасаввур қилиб бўлмаслигини алоҳида таъкидлаб, Суперлига учрашувларини томоша қилиш учун стадионга ташриф буюрадиган мухлислар учун барча қулайликларни яратиш зарурлигини қўшимча қилиб ўтди.

“Мурувват” болалар уйи, Қарши шаҳар олимпия захиралари мактаб-интернати ва “Насаф” клуби академиясидан кейин ЎФА 1-вице-президенти Умид Аҳмаджонов Вилоят ихтисослаштирилган болалар ва ўсмирлар сув спорти турлари Спорт мактабида ҳамда Қарши шаҳар болалар ва ўсмирлар спорт мактабида бўлди.

Умид Аҳмаджонов бу ўқув даргоҳларида тарбияланувчилар учун яратилган шароитлар, уларнинг овқатланиш рациони, ётоқхонаси, спорт иншоотлари, машғулотлар майдонлари, сув ҳавзаларини кўздан кечирди. Олиб борилаётган ишлар билан яқиндан танишди ва камчиликларни бартараф этиш бўйича тегишли кўрсатмалар бериб ўтди.

Кун охирида эса  вилоят ҳокимлигининг мажлислар залида Қашқадарёда спорт, хусусан, футбол соҳасини ривожлантиришда олиб борилаётган ишлар, йўл қўйилаётган камчиликлар бўйича йиғилиш ўтказилади ва тегишли хулосалар қилинади.