U-20 ЖЧ. Бугун Ўзбекистон 1978 йилги жаҳон чемпионати ўтказилган стадионда ўйнайди

"Estadio Malvinas Argentinas" Аргентинанинг Мендоса шаҳрида жойлашган стадион бўлиб, ўз бағрига 42 000 томошабинни сиғдира олади. 

Мазкур ҳудуддаги энг катта спорт иншооти футбол бўйича 1978 йилги жаҳон чемпионатини ўтказиш мақсадида бунёд этилган.

Стадионда футбол билан бир қаторда регби спорт ўйинлари ҳамда мусиқий концертлар ҳам бўлиб ўтади. Маҳаллий дивизионда иштирок этувчи "Годой Круз" клуби баъзи учрашувларни ушбу майдонда ўтказади.

1966 йилнинг 6 июлида Аргентина 1978 йилги жаҳон чемпионатига мезбонлик қилиш ҳуқуқини қўлга киритди. Ташкилий қўмита томонидан Сан-Мартин боғи ҳудудида қуриладиган янги стадион ҳам ўйинларни ўтказиш учун тавсия этилди.

Мажмуа уругвайлик Рафаэль Виноли томонидан лойиҳалаштирилди ва 1976 йил қурилиш ишлари бошланди. Майдон дастлаб "Estadio Ciudad de Mendoza" деб номланган. Ўйингоҳдаги очилиш учрашуви 1978 йилнинг 14 май куни Мендоза ва Сан-Рафаэль жамоалари ўртасидаги ўртоқлик ўйинига тўғри келган.

"Estadio Malvinas" 1978 йилги мундиалнинг олтита учрашувига мезбонлик қилган.

1982 йилдаги Фолькленд урушидан сўнг ўйингоҳ номи "Estadio Malvinas Argentinas"га ўзгартирилди. Янги ном Аргентинанинг Фолькленд ороллари устидан суверенитетга даъвогарлигини ўзида акс эттириши лозим эди.

Иншоотда кўпгина клублар уй учрашувларини ўтказган. Сўнгги йилларда томошабинлар "Годой Круз" иштирокида беллашувларни ушбу майдондан туриб кузатишган.

Стадион 2011 йил Аргентинада бўлиб ўтган Америка кубоги учун қайта таъмирланган.

20 ёшгача бўлган футболчилар ўртасидаги жаҳон чемпионатининг кўпгина учрашувларига ҳам айнан ушбу майдон мезбонлик қилмоқда. Жумладан, гуруҳ босқичи доирасидаги 12 ҳамда нимчорак финалнинг 2 ўйини айнан мазкур мажмуада бўлиб ўтади. 

"Estadio Malvinas" Ўзбекистон ёшлар терма жамоасининг нимчорак финал доирасидаги Исроилга қарши учрашуви мезбони бўлади.

Ўйингоҳ ўзининг тарихий кўринишини сақлаб қолгани ва қулай ҳудудда (табиат қўйнида, улкан боғ ҳудудида қад ростлаган) жойлашгани билан алоҳида аҳамият касб этади. Яшил майдон атрофида мухлислар майдонга тушиб кетишининг олдини олиш мақсадида ариқ қазилган ва у ҳозиргача сақланиб қолган.

Эслатиб ўтамиз, U-20 жаҳон чемпионати 1/8 финалидан ўрин олган Ўзбекистон — Исроил учрашуви Тошкент вақти билан 31 майга ўтар кечаси соат 02:00 да старт олади.