Тимур Кападзе киберспортга муносабати ҳақида гапирди

Мутахассис тадбир давомида киберспортга муносабати ҳақида гапириб ўтди. 

"Бугун юртимизда катта компьютер клуби очилди. "Фиданза" гейм-клубининг очилиш маросимида иштирок этдим ва бундан хурсандман. Бу ерда киберфутболчилар учун барча шароитлар яратилган экан. 

Киберспортни ҳақиқий спорт билан солиштирадиган бўлсак, бу ерда ҳам тўқнашувлар мавжуд. Аммо, ёшларимиз шу билан бирга спорт тўгаракларига бориб, ҳақиқий спорт билан шуғулланишни ҳам эсдан чиқариб қўймасликлари лозим. 

Тўғри, бу ҳам албатта ўзига яраша завқ беради. Ўйлайманки, Ўзбекистонда киберспорт янада ривожланади ва юртимизни жаҳонга яхши томонлама танитиб, катта ютуқларга эришишади", - деди Тимур Кападзе. 

Маълумот учун, янги очилган "Фиданза" электрон спорт мажмуаси 1000 кв.метр майдонда бунёд этилган ва бу ерда 160 компьютер ва PlayStation ўрнатилган 10 кабинка ўрин олган. Шу билан бирга тўлақонли кафе-бар ва дам олиш зоналари ташкил этилган.

Тадбир давомида шунингдек, бокс бўйича Ўзбекистон терма жамоаси аъзоси Абдулҳай Шораҳматов ва таниқли спорт шарҳловчиси Даврон Файзиев ҳам иштирок этди. 

"Ушбу "Фиданза" гейм-клуби очилишида иштирок этганимдан хурсандман. Клубда шароитлар яхши. Бу ерда киберспорт бўйича катта мусобақалар ҳам ўтказса бўлар экан. Умид қиламанки, айнан шу ердан киберспорт бўйича иқтидорли спортчилар етишиб чиқишига умид қилиб қоламиз. Энди биз боксчилар машғулотлардан кейинги чарчоқдан сўнг дам олиш учун, айнан шу ерга келиб ҳордиқ чиқарамиз", - деди боксчи Абдулҳай Шораҳматов. 

Шарҳловчи Даврон Файзиев эса кучли киберспортчиларни тайёрлашда, мана шундай ареналарнинг аҳамияти катта эканлиги ҳақида гапирди. 

"Энг аввало "Фиданза" клубининг очилиш маросимида иштирок этган барчани табрикламоқчиман. Бундай марказларнинг ўзимизда ҳам очилгани яхши бўлди. Чунки, ёшлар турли жойларга бориб компьютер ўйинларини ўйнашга ҳаракат қилишади. Лекин, мана шундай замонавий қулайликларга эга, ҳордиқ чиқариш имкониятига эга жойнинг барпо этилгани жуда яхши бўлди.

Бутун дунёда геймер ёшлар турли катта турнирларда иштирок этишади ва ғолиб чиқишади. Ғалаба қозониш учун албатта яхши шароитларда тайёргарлик кўриш керак. Бу нафақат ҳақиқий спорт, балки киберспортда ҳам аҳамиятга эга. Яхши ва замонавий техникалар ҳам яхши экан. Шаҳсан менга жуда ёқди. 

Жуда кўп ўйнамайман. Вақт масаласида бироз муаммолар бор. Лекин, ўйнагим келиб қолган пайтда айнан мана шундай шароит бўлишини истайман. Тинч муҳит, алоҳида хоналар, яхши техника... Бу ерда ана шундай шароитни кўрдим", - деди Даврон Файзиев.