Тиаго Безерра: "Ўйиннинг аҳамияти бизга қўшимча иштиёқ беради"

"Нефтчи" билан учрашув арафасида "Пахтакор" ярим ҳимоячиси Тиаго Безерра ўз фикрлари билан ўртоқлашди. Бу ҳақда клуб матбуот хизмати хабар берди.

- Биз яна бир қийин ўйин ўтказишимиз тайин. Чунки "Пахтакор"га қарши ҳар бир жамоа футбол ўйнашга имкон бермаслик учун ҳаракат қилмоқда. Биз беллашувга имкон қадар муносиб тайёрланишга интиляпмиз. Ўтган йили бу рақибни уйда 6:0 ҳисобида ютгандик, аммо айни пайтда "Нефтчи" таркиби ўзгарган. Уларда ижобий ўзгаришлар кузатилди. Шу сабабли учрашувни катта эътибор билан ўтказишимиз лозим. Аввалги беллашувда бу жамоага қарши икки гол урганман ва икки марта голли тўп оширишларни уддалагандим. Бу сафар ҳам жамоага фойда келтирадиган ўйин намойиш қилишга уринаман.

"Пахтакор" ва "Нефтчи" ўртасидаги тўқнашувларнинг ўзига хослигини билиб олдим. Бу менга ва жамоага қўшимча иштиёқ бағишлайди. Мухлисларимизга маъқул бўладиган футбол кўрсатиб, ғалаба қозонишга ҳаракат қиламиз".