Темур Кападзе: "Биз учун ғалаба жуда керак эди"

- Ўйин қанчалик қийин кечди?
- Биринчи учрашув ҳеч қайси жамоа учун осон кечмаслиги аниқ эди. Бугун ҳам шундай бўлди. Биринчи бўлим бироз қийинроқ бўлди, аммо танаффусдан кейин ўзимизни кўрсата олдик. Биз учун бу беллашувда чиройли ўйиндан кўра, ғалаба қозониш муҳимроқ эди.

- Рақиб қайси томонлама қийинчилик кўрсатди?
- Биз кореяликларни иккинчи рақамли жамоа сифатида ҳаракат қилишини билардик. Ва шунга яраша тайёргарлик кўргандик. Рақиб асосан "иккинчи қават"да устунлик қилишга ҳаракат қилди. Биз гол уриб олгач, КХДР асабийлаша бошлади, агар иккинчи тўпни ҳам киритганимизда, улар умуман ўйин тизгинини қўлдан чиқариб юборган бўлишарди.

- Бир вазиятда бош билан гол уришингиз мумкин эди.
- Ўша вазиятда кореяликларни шунчаки омад голдан қутқариб қолди деб ўйлайман. Агар тўп дарвоза устунига тегмасдан гол бўлганида, биз учун ўйиннинг қолган қисми янада осон кечарди.

- Ҳакам томонидан қўшиб берилган охирги дақиқада гол ўтказиб юборишимиз мумкин эди.
- Ўша вазиятда ўзимизни бироз бўш қўйиб юбордик. Албатта, баҳс охирларида ҳамма толиққан, қолаверса, ўйин пайтидаги кучли ёмғир - буларни ҳам инобатга олиш лозим. Яхшиям ўша вазиятда Игнатий Нестеров тўпни қайтариб юборди, агар гол ўтказиб юборганимизда жудаям аламли бўларди.