Суперлига қуръаси олдидан. Мутахассис фикри: "Футболи ривожланган мамлакатлар қуръа ташлашда бошқа тизимлардан ҳам фойдаланмоқда"

Мазкур тадбир олдидан "Бунёдкор", "Андижон" клублари собиқ директори, тажрибали мутахассис Улуғбек Мирзаев фикр ва таклифлари билан ўртоқлашди. 

"Ҳар йили қуръа ташлаш маросими бергер тизимида ўтказилади. Лекин футболи ривожланган мамлакатларда "Opta",  "SciSports" тизимлари йўлга қўйилган. Тақвим тузишда шулардан фойдаланилади. Биласизми, бугун футбол катта спорт даражасидан ҳам ошиб кетди.   Ҳозир маркетинг, бизнес, трансляциялари билан олдинга силжиди. Масалан мен Суперлига қуръасини автоматик тарзда тасодифий усул билан тақвим аниқланишига қаршиман. Буни ярим автоматик тарзда амалга оширса бўлади.  Яъни тақвимни тузиб туриб, айрим жойларини инсон фактори асосида ўзгартириш мумкин. Нима учун? Тасодифий танлаш усулида битта жамоа кетма-кет кучли рақиблар билан тушиб қолиши мумкин. "Хоразм",  "Машъал" каби жамоалар мавсумга қийналиброқ тайёргарлик кўраётган, таркиби оддийроқ жамоаларни мағлубиятга учраб қолиши уларнинг ҳомийлари, мухлисларини, футболчиларни совутиб қўяди. Масалан, АПЛда ярим автоматик тарзда ўзлари ўзгартириш киритишади. Битта жамоа қаттиқ зарба олиб қолмаслиги инобатга олинади. Россия, Франция, Италияда ўзлари тузиб чиқади. Қуръа ўтказмай клублар билан келишиб тақвимни тасдиқлашади. 

Яна шундай ҳолат борки,  "Пахтакор",  "Бунёдкор",  "Хоразм", "Машъал",  ОКМК клублари Тошкент ва Тошкент вилоятида ўйнашади. Уларнинг уй ўйинларини алоҳида кунларга қўйиш керак. Мухлисларда учрашувларни стадионда кузатиш имкони кўпроқ бўларди. Катта беллашувларни алоҳида кунларга ажратиш мақсадга мувофиқ ҳисобланарди. Дейлик "Нефтчи"нинг ўйинларига Андижон, Фарғонадан кўп мухлислар келиши мумкин. 

Бизда Термиз иссиқ худуд. Бу билан "Сурхон" кўпроқ сафарда ўйнашини таъминлаш мумкин. Мисол учун ОЧЛда қатнашадиган "Андижон",  "Насаф"га енгилроқ рақибларни рўбарў қилиш мумкин. Яна ўтган йили футзал бўйича Жаҳон чемпионати ўйинлари Андижонда ўтказилди. Бу жамоанинг уй ўйинларига тўғри келиб қолди. Тақвим тузишда мана шу каби омилларни ҳисобга олиш зарур",- дейди Улуғбек Мирзаев.