Суҳроб Иззатов: "Ўйлашимча, адолатли ҳисоб қайд этилди"

Дастлаб 63-дақиқада мезбонлар таркибида Суҳроб Иззатов ҳисобни очди. Орадан кўп вақт ўтмай, Сардор Раҳмонов мувозанатни тиклади. Учрашувдан сўнг Суҳроб билан боғланиб, унинг таассуротларига қулоқ тутдик. 

"Биз ғалаба учун майдонга тушгандик, - дея гап бошлади Иззатов. Аммо фикримча қайд этилган ҳисоб адолатли бўлди. Иккала жамоа ҳам кўплаб вазиятлар яратган бўлса-да, ундан фойдалана олмади ва кучлар тенг келди. Бугун икки жамоа ҳам охирги дақиқаларгача ғалаба учун майдонга чиққанлигини кўрсатди",- дейди Суҳроб Иззатов.

- “Насаф”дан учралган йирик мағлубият бугунги ўйинга таъсир қилдими?

-  Қаршида учралган мағлубиятни аллақачон унутганмиз. Ўша баҳсда қўлимиздан келганча ўйнадик. Афсуски, омад етишмади ва йирик ҳисобда мағлубиятга учрадик. Бугун буни унутиб, майдонга тушдик. 

- Мавсумнинг қолган ўйинларидан нималарни кутмоқдасиз?

- Энди ортга йўл йўқ. Шу туфайли қолган ҳар бир учрашувда ғалаба қозонишга ҳам очколаримиз сонини кўпайтириб олиш учун майдонга тушамиз. Кейинги турлардаги рақибларимиз ҳам кучли. Осон ўйинни ўзи қолмаган. Шундай бўлса-да, “Бунёдкор” курашишда ва очко йўқотмасликка интилади. 

- Жамоангиз мавсумни нечанчи ўринда тугатишни режалаштирган?

- Мавсум бошида олдимизга чемпионлик вазифаси қўйилганди. Керагидан ортиқ очколарни бой берганимиз учун ҳам юқорида белгиланган вазифадан узоқлашиб кетдик. Шунга қарамай, мавсумни кучли учликда тугатишга интиламиз. Бу борада бизда имконият бор.

- АГМКга қарши кечган ўйинда кўплаб етакчи футболчилар “Бунёдкор”га ёрдам бера олишмади. Уларнинг ўрни билиндими?

- Албатта, етакчи ўйинчилар йўқлиги билинди. Бугун Лутфулла Тўраев, Фарррух Икромов, Миржаҳон Мираҳмадов ва Расул Йўлдошев каби жамоадошларим ёрдам бергани йўқ. Табиийки, бу бизнинг ўйин услубимизга таъсир қилади.