Суарес Это’Одан, Месси Мюллердан ўзиш илинжида. Хуллас, “Барселона” кўчасида байрам
08 янв 2018 14:03
Новости

Суарес Это’Одан, Месси Мюллердан ўзиш илинжида. Хуллас, “Барселона” кўчасида байрам

Исмим кимгадир қизиқ деб ўйламайман. Статистикани севаман, қадрлайман ва у энг кераклиси деб биламан. Балки шунинг учун бўлса керак, мени эркалаб “математик” деб чақиришади.

Кеча Испания Ла Лигасида 18-тур беллашувлари бўлиб ўтди. Мазкур турдан кейин “Барселона”нинг икки ҳужумчиси статистиклар учун иш топиб берди.

Луис Суарес“Леванте” дарвозасига гол урган уругвайлик ҳужумчи “Барселона”нинг 7-рақамли тўпурари бўлиб олди. У эндиликда Самуэль Это’Они ортда қолдира бошлади. Шу вақтга қадар камерунлик ҳужумчига “Барселона”нинг расмий ўйинларида 131 та гол уриш насиб қилганди. Суаресда эса аниқ зарбалар сони 132 тага етди.

Каталония клубида энг кўп голни Лионель Месси урган — 527 та.

Лионель Месси

Месси кеча “Леванте”га қарши ўйини билан “Барселона” шарафини Ла Лига доирасида 400-бор ҳимоя қилди ва фақатгина Испания чемпионати ҳақида гап кетганида, 365-голини урди. Шу тариқа Месси кучли бешликда гол уриш борасида Герд Мюллернинг рекордини такрорлади.

Мюллерга шунча гол уриш учун 427 та ўйин керак бўлганди. Месси эса барчасига 400 та беллашувда эриши. Келаси турдан бошлаб у Мюллер номини шоҳсупадан ўчиришга ҳаракат қилади.

“Васко да Гама”Бу клубнинг Испания Ла Лигасига нима алоқаси бор, деб сўрашингиз мумкин. Коутиньони харид қилган “Барселона” айни вақтда “Васко да Гама” ҳисоб рақамига 4 миллион евро ўтказиб бериши керак. Чунки жамоа Коутиньони катта футболга узатиб бергани билан тарихга кирган.

Коутиньонинг трансфери бонуслари билан қўшганда 160 миллионга айланмоқда. ФИФА эса футболчини тарбия қилган мактабларни унутмайди ва 2,5 фоиз унга ажратишни талаб қилади. Аввалроқ “Ливерпуль” клуби ўз мухлисларини қанчалик ҳурмат қилишини кўрсатиб, мавсум аввалида Коутиньо исми туширилган футболкаларни харид қилганларга 56 евро турадиган ваучерлар бериши ҳақида айтиб ўтганди.

Хосе КальехонҲа, у Италияда — “Наполи”да тўп сурмоқда. Бироқ у испаниялик. Демак, эътибордан четда қолиб кетмайди. Ахир у А серияда тўп сурган испанияликлар орасида энг кўп гол урган футболчига айланиб олди.

А серия клуби билан шартнома имзолаган илк испан футболчиси Луис Суарес Мирамонтес ҳисобланади. Ўз вақтида “Интер” ва “Сампдория” клубларида тўп сурган собиқ футболчи, эндилик Кальехондан ортда қолиб кетди. “Верона”га қарши ўйинда Хосе А сериядаги 52-голини нишонлаганди.