Стадник хотирасига бағишланган VIII халқаро турнир бўлиб ўтди (ФОТО)

Анъанавий тарзда ўтказиб келинаётган болалар ва ўсмирлар ўртасидаги мусобақада Ўзбекистон ва Қозоғистондан 8 та жамоа иштирок этди. Булар: “НИК-Қорабулоқ” (Чимкент вилояти, Қозоғистон), “Олимпия” (Тошкент), “Бухоро” (Бухоро), 24-Болалар ва ўсмирлар спорт мактаби (Тошкент), “ТАПОИЧ” (Тошкент), “Олмалиқ” (Олмалиқ), “Бунёдкор-2003” (Тошкент) ҳамда Тошкент шаҳар махсус футбол мактаби (Тошкент).



Мусобақа якунига кўра, Бухоро шаҳрининг “Бухоро” жамоаси 1-ўринни эгаллади. Улар ҳал қилувчи финал учрашувида Тошкент шаҳар махсус футбол мактаби жамоасидан устун келишди. Кучли учликка Қозоғистоннинг “НИК-Қорабулоқ” жамоаси якун ясади.

Турнир якунида ғолиб ва совриндорларга ташкилотчиларнинг қимматбаҳо совғалари, кубок, медал ҳамда дипломлар топширилди. Совринларни ўз эгаларига ўзбек футболига кўплаб истеъдодларни етказиб берган фахрий мураббий Евгений Валицкий, устоз шарҳловчи Ахбор Имомхўжаев, Станислав Стадникнинг дўстлари Иван Шкандин, Анатолий Никитинлар тақдим этишди.



Шунингдек, ҳар бир жамоадан бир нафардан энг яхши футболчи ҳам тақдирланди: Абдувоитов Санжар (“Ник-Қорабулоқ”, Қозоғистон), Тошпўлатов Нурмуҳаммад (Тошкент шаҳар махсус футбол мактаби), Ражабов Шерзод (“Олимпия”), Каримов Улуғбек (“Бухоро”).

Ушбу халқаро хотира турнирини ташкил этишда Бектемир туманидаги Болалар ва ўсмирлар спорт мактабининг жонкуяр мураббийи Анатолий Алексеевич Лошинин, ЎФФ Фахрийлар кенгаши раиси Наримон Жалолов ҳамда Станислав Стадникнинг дўстлари жонбозлик кўрсатишди.

Мавлон Шукурзода тайёрлади