Швеция терма жамоаси бош мураббий ёмон натижалар сабаб ишдан ҳайдалди

Швеция футбол уюшмаси Йон-Дал Томассонни лавозимидан озод этганини эълон қилди. Бу қарор жамоанинг ЖЧ-2026 саралашидаги қониқарсиз натижалари сабабли қабул қилинди.

Ушбу лавозимга номзодларни қидириш ишлари зудлик билан бошланади.

"Швеция футбол уюшмаси томонидан қабул қилинган қарор терма жамоа биз кутган натижаларга эриша олмаганига асосланади. Март ойида плай-офф ўйинларида иштирок этиш имкониятимиз ҳали бор ва бизнинг бурчимиз жаҳон чемпионати финал босқичига чиқиш учун энг қулай шароитларни яратишдан иборат. Шу боис терма жамоага янги мураббий раҳбарлигида янги бошқарув керак, деб ҳисоблаймиз," - деди ташкилот раиси Симон Острем.

Швеция терма жамоаси ЖЧ-2026 саралашининг 4 та ўйинидан сўнг 1 очко тўплаб, Б гуруҳи жадвалида охирги, 4-ўринни эгаллаб турибди. Гуруҳда Швейцария терма жамоаси 10 балл билан пешқадамлик қилмоқда, ундан кейин Косово (7 очко) ва Словения (3 очко) жойлашган.