"Шўртан": Сергей Ковшовни табриклаймиз

Жорий йилги мавсумдан эътиборан Ғузорнинг “Шўртан” жамоасига устозлик қилаётган тажрибали мутахассис бугун 59 ёшни қарши олмоқда. Сергей Геннадьевич ўз даврида футболчи сифатида мамлакатимизнинг номдор жамоаси “Пахтакор” (Тошкент), “Трактор” (Тошкент), “Звезда” (Жиззах), “Навбаҳор” (Наманган), “Сўғдиёна” (Жиззах), “Нурафшон” (Бухоро) каби клубларида тўп сурди. 

Мураббий сифатида “Хоразм” (Урганч), “Қибрай” (Тошкент вилояти), “Пахтакор” (Тошкент), “Локомотив” (Тошкент), “Навбаҳор” (Наманган), “Динамо” (Самарқанд), “Нефтчи” (Фарғона), “Андижон” (Андижон), “Қўқон-1912” (Қўқон), “Сурхон” (Термиз) ва “Шўртан” (Ғузор) каби жамоаларда фаолият олиб борди. Эслатиб ўтиш жоиз, Сергей Ковшов бундан аввал 2007 йилги мавсумда ҳам Ғузорда ишлаган эди. Демоқчимизки, унинг учун “Шўртан” жамоаси бегона эмас. 

Фурсатдан фойдаланиб, “Шўртан” Профессионал футбол клуби раҳбарияти, ишчи-ходимлари, мураббийлари, футболчилари ва кўп минг сонли мухлислари номидан Сергей Геннадьевич Ковшовни бугунги туғилган куни билан самимий қутлаймиз. “Оқ бўрилар” жамоасининг бош мураббийига аввало соғлик-саломатлик, оилавий тинчлик ва хотиржамлик ҳамда Ғузор жамоасини яна Суперлигага олиб чиқиш йўлидаги ҳаракатларига омад тилаймиз!

“Шўртан” ПФК матбуот хизмати бўлими