Шоҳруз Норхонов: “Олдинги ҳолатимга чиқа олмаяпман, буни инкор қилмайман”

Илк турда Муборакда “Машъал” меҳмони бўлиб йирик ҳисобда мағлубиятга учради. Кейинги учрашувларда ҳам ижобий натижага эришган йўқ. Ортда қолган учта тур ҳусусида жамоанинг махоратли ҳужумчиси Шоҳруз Норхонов фикларини билдириб ўтди.

“Тўғри, масумни ўзимиз хоҳлагандек бошлай олмадик. Лекин, олдимизга қўйилган мақсад сари интилишда давом этамиз. Ишлашдан, ҳаракат қилишдан тўхтамаймиз. Ҳозирги вақтда Суперлига ўйинлари вақтинчалик қолдирилди. Буни тўғри тушунишимиз даркор. Соғлиқ доим ҳамма нарсадан устун туради. Қаторасига учинчи йилдирки “Суғдиёна” шарафини ҳимоя қилмоқдаман. Чемпионат стартида қониқарли натижалар кўрсата олмаслигимиз мумкин. Аммо, охиргача курашиб муносиб ўринларни эгаллаймиз.

Даражам аввалгидан тушганига сабаб нима? Ишлашда давом этаман. Олдинги юқори ҳолатимга чиқа олмаяпман, буни инкор қилмайман. Ўзимни кўрсатишга астойдил ҳаракат қиламан. Қолганини вақт кўрсатади. Миллий терма жамоа билан февраль ойидаги йиғинда қатнашдим. Бу менга қўшимча куч беради ва ўзимга бўлган ишончни ошишига хизмат қилади”, - дейди Норхонов.

Абдулазиз Искандаров ёзиб олди