Шоҳруҳ Ишанов: "Энди бор эътиборимизни Биринчи лигага қаратамиз"

- Ўйин ҳақида

- Аввало, "Турон" жамоасини ҳақли ғалаба билан табриклайман. Ўйинга келадиган бўлсак, "Шўртан" билан баҳсдан кейин ёрдамчи мураббийларимиз билан биргаликда ўйинимизни анча муҳокама қилгандик. Бугунги ўйин учун ҳимоявий ўйинни танладик. Машғулотларда шу асосида иш олиб бордик, 

Шогирдларимга ўйин учун раҳмат айтаман. Ғалаба учун ҳаракат қилгандик, аммо ўйин охирида битта зарба орқали мағлуб бўлдик. Бугун омад "Турон" томонда бўлди. Энди бор эътиборимизни Биринчи лигага қаратамиз. 24 апрель куни бизни "Насаф-фарм"га қарши баҳс кутиб турибди.

- Абубакир Режаббоевнинг ҳолати ҳақида маълумот бера оласизми?

- У жамоамизнинг муҳим аъзоси, ўнг қанот ҳимоячимиз саналади. У бугунги кунда Ўзбекистон U17, U18 терма жамоасида асосий таркиб ўйинчиси. Ҳолати ҳозирда яхши, ҳозирги пайтда шифохонада бўлиб турибди. Худо хоҳласа уни 2-турда майдонда кўрамиз.

- "Шўртан" билан баҳс (0:3) бугунги ўйиндан тубдан фарқ қилганди. Буни қандай изоҳлайсиз?

 - Жамоалар бизга нисбатан жуда кучли. Биз катта футболга эндигина кириб келдик. Йигитлар секин-аста ўзларини кўрсатишмоқда. "Шўртан" билан учрашувда ҳимоявий ўйин кўрсатишни режа қилгандик, аммо олдинга ташланиб, таваккал ўйнаганимиз панд берганди. Бугун мухлисларбоп ўйин бўлди.