Шоди Номозов: "Шўртан" Пишур билан шартнома имзолади"

Ёдингизда бўлса, у ўтган йили ярим мавсум “Навбаҳор”да тўп сурганди ва кейин Қозоғистоннинг “Тараз” жамоасига ўтиб кетган. Бу йилдан бошлаб у яна олий лигамизда тўп сурадиган бўлди. Бу сафар ҳужумчининг хизматларига “Шўртан” клуби қизиқиш билдирди. Шу боис клуб ижрочи директори Шоди Номозов мазкур вазиятга ойдинлик киритди.

- Пишур ва унинг агенти билан асосан жамоамиз бош мураббийи Александр Волков гаплашди. У Тошкентга келиб жамоамиз сафига қўшилди, ҳаммаси жойида. Футболчи билан барча масалаларни келишиб олдик  ва шартнома имзоладик. Энди таркибимиз деярли аниқланди. Обид Жўрабоев, Азиз Ғуломхўжаев, Саидкомил Акбаров, Сардор Собирхўжаев, Жаҳонгир Жиямуродов, Отабек Нарзуллаев, Қадамбой Нурметов, Сирожиддин Ҳамроев каби янги ўйинчилар энди “Шўртан” таркибида тўп сурадилар.  

Фурсатдан фойдаланиб шуни қўшимча қилмоқчиманки, ҳамма жойда ҳар хил фикрлар юрибди. Яъни, шунча меҳнат қилган Ихтиёр Каримовни нима учун бўшатиб юбординглар деб сўрашяпти. Аммо вазият бундай эмас. Унда “Про” лицензияси бўлмаганлиги сабабли иш маоши сақланган ҳолда вақтинча техник директор вазифасига ўтказдик. Июль ойида Каримовни “Про” лицензиясига албатта ўқитамиз. У билан ҳамма вақт фикрларимиз бир бўлиб келган. Доим Ғузор футболи учун меҳнат қилиб келган. Мухлислар ҳам Ихтиёр Каримовни ҳурмат қилишади. Биз бундай мутахассис билан ҳамкорликни яна давом эттирамиз, - деди Номозов.

“Шўртан” жамоаси Тошкентдаги йиғини мобайнида ўртоқлик учрашувларини ўтказиши ҳам режадан ўрин олган.

ФИРДАВСХОН