Шерзод Сатторов: "Суперлигада ўйнашни ким ҳам хоҳламайди дейсиз?"

- Бугунги ўйин ҳақида фикрларингиз...
- Учрашув ҳақида нима дейиш мумкин, учрашув оғир кечишини билар эдик. Биринчидан узоқ йўл босиб келганлигимиз туфайли бугунги ўйинда футболчиларимизда ҳорғинлик кайфияти сезилди. Иккинчидан, ўйинни ёмон бошламадик, бизда голга тортадиган вазиятлар бор эди. Лекин бугун рақибларимизга омад кулиб боқди. Биз имкониятлардан фойдалана олмадик, улар эса фойдаланишди. Лекин бизда яхши имкониятлар бор эди. Хечқиси йўқ, биз кейинги учрашувларга янада жиддийроқ ҳаракат қиламиз.      

- Ғиждувон жамоаси олдига қандай вазифалар қўйилган?
- Бизнинг жамоасни мақсади – туманимизда футболни янада ривожлантириш, клуб инфратузилмасини янада яхшилаш, ёшларни келажакда маҳоратли футболчи сифатида шаклланишларига кўмаклашиш, клубимиз базасини янада яхшилаш кабилардан иборат. Бизинг клуб базаси бу майдондан яхшироқ, майдон сифати яхши, умуман айтганда ҳамма шароит бор. Яратилиб берилган шароитлар учун туманимиз ҳамда клубимиз раҳбарларига миннатдорчилик билдираман.
Клубимиз ҳоҳлайди, барчамиз ҳоҳлаймиз Суперлигада ўйнашни. Ким ҳам ҳоҳламайди дейсиз? Биз ҳаракат қиламиз келажакда жамоамизни юксак даражага олиб чиқишни. Биз режа қиляпмиз, иккинчи даврада таркибимизга янада кучлироқ футболчиларни жалб этиб, жамоамизни янада кучайтирмоқчимиз.          

Бекзод Толибов ёзиб олди.