Сергей Арсланов: "Кучли прессинг билан ўйнаш жуда кўп куч талаб этади"

- Ўйин ҳақидаги фикрларингиз?

- Бугун хар хил иккита тайм гувоҳи бўлдик. Биринчи таймда жуда яхши ўйин намойиш этдик. Прессингда яхши ҳаракатландик. Иккинчи таймда эса, ҳимоявий ўйин услубига ўтдик. Гол ўтказиб юборганимиздан сўнг ҳам йигитлар ҳужум қилишди ва олдинга боришди. Чемпионатимизнинг энг кучли жамоаларидан бирига қарши ўйнаш осон бўлмаслиги аниқ эди.

- Бугун Сильванус Нимели ёрқин ўйин кўрсата олмади. Бунга сабаб "Пахтакор" ҳимоячилари Нимелини яхши ўрганиб чиқишганими?

- Ҳа, "Пахтакор" ҳимоячилари Нимелини яхши ўрганиб чиқишибди. Биринчи таймда Нимели кўпроқ вазият яратиш билан шуғулланаётган эди, иккинчи таймда эса у кўпроқ марказий ҳужумчи сифатида ўйнади. Ўйлайманки у бугун ёмон ўйин намойиш этмади.

- "Сурхон" жамоасига 90 дақиқа майдонда ҳаракат қилишга жисмоний ҳолати етишмаётгани сабаб, жамоа бугун мағлуб бўлди деб ўйлайсизми?

- Тўғрисини айтсам кучли прессинг билан ўйнаш жуда кўп куч талаб этади. Биринчи таймда йигитлар кучга тўла эди ва шу сабаб "Пахтакор"ни анча қийнаб қўйишди. Фикрингизга қисман қўшиламан. Йигитлар иккинчи тайм сўнгида ҳам яхши ҳаракат қилди.

- Сўнги ўйинларда Асилбек Жумаевга қарши кўп фоллар ишлатилаётгандек. Бунга фикрингиз қандай?

- Асилбек ёш ва жуда талантли футболчи. У ҳимоячиларга қарши боришдан қўрқмайди ва дриблинг ишлатади. У қўрқмай иккита ҳимоячига қарши ҳам ўйнай олади. Шу сабаб ҳимоячилар кўп фол ишлатишади. Ҳимоячини бир икки маротаба алдаб ўтсангиз, у кейинги сафар сизга қарши фол ишлатади.

- "Пахтакор" ўтган мавсум "Сурхон"ни икки тўқнашувда ҳам мағлуб эта олмади. Бу мавсум эса "Пахтакор" "Сурхон"га қарши жуда қийналди. Келажакда "Пахтакор"га қарши "Сурхон" қандай ўйнай олади?

- Ҳозирги кунда барча жамоаларнинг имкониятлари тенглашиб қолди. Мусобақа жадвалида пастки ўринлардан жой олган жамоалар қўрқмай "лидер"ларга қарши ўйнаш олишмоқда, авваллари ундай эмас эди Жамоаларнинг молиявий ҳолатлари ҳам жуда ҳар хил эди. Мен келажакда "Пахтакор"ни мағлуб эта олишимизга ишонаман.