Секейра Португалия нашрига: "Ўзбекистонга анча мослашиб олдим"

"Бизда ҳаммаси яхши, кетма-кет олтита ғалабага эришдик ва сўнгги саккизта ўйинда ютқазмадик. Чемпионатда 4-ўринда бормоқдамиз, шунингдек Кубокда ҳам иштирок этяпмиз. Сешанба куни муҳим ўйинимиз бор ["Металлург"га қарши ўйин], агар шунда ғалаба қозонсак, жадвалда анча юқорилаб оламиз.

Аслида умуман бошқача, жуда агрессив футбол, жуда ҳам Совет Иттифоқи услубига ўхшайди, ҳакамлар бизнинг критериялардан фойдаланмайди, улар жуда юқори агрессивликка ҳам чидашади. Ҳатто ўйинчиларимдан бири оёғини шикастлаб олган бўлса ҳам, рақиб огоҳлантириш ҳам олмади. Уларнинг мураббийи эса ўйинчининг тезроқ чиқиб кетишини айтди, сабаби ютқазаётган эди, ўйинчим эса замбилда майдонни тарк этди. Бунақасини олдин кўрган эмасман! Ҳакамлар эса ўйинни давом эттиришга руҳсат беришади.

Бошида тактик жиҳатдан ҳам, маданий жиҳатдан ҳам қийин бўлди. Иккита ўйинда ютқаздим, илк ўйинда эса биринчи дақиқаноқ гол ўтказиб юбордик. Бу жуда қийин бўлди, бундан ташқари шахсий сабабларга кўра энг яхши ўйинчим йўқ эди. Ҳозир анча мослашиб олдим, ўйинчилар ҳам менинг ғояларимга кўникишди.

Саудия Арабистонида бўлганим учун менда "маданий шок" бўлмади. Ҳа, албатта, қийин пайтлар бўлади, ҳозир Рамазон ойи, барча жиддий тарзда бунга амал қилмоқда. Улар ейишмайди ва ичишмайди, шу билан бирга жуда юқори ҳароратда, масалан 36 градусда ўйнашади.

Шаҳар фантастик, тўла европача, мамлакат жуда бой, унда имкониятлар катта ва ўсмоқда, у 4-5 йилдан сўнг осонгина катта даражага эришиши мумкин. Бу Россиядан бошланиб, бошқачаларга яқинлашаётган мамлакатдир", - дейди Секейра.