Сато Минори, Наоя Шибамура, Барданка. Ўзбекистон чемпионатида тўп тепган Шарқий Осиёликлар ҳозир қаерда?

Лекин, олдинги йилларда шарқий осиёлик ўйинчилар хизматидан фойдаланган клубларимиз ҳам бўлди. Тушунган бўлсангиз гап Олий ва Суперлигамизда тўп тепган Япония ва кореялик легионерлар ҳақида кетмоқда. "Пахтакор" ва "Бухоро" да ўйнаган Наоя Шибамура ёдингиздами? "Бунёдкор"да муваффақиятли натижаларга эришган Сато Миноричи? Пайқаганингиздек бугун ушбу футболчилар ҳақида фикрлашамиз.

Наоя Шибамура – 2012-2013 йилги мавсумларда Ўзбекистон олий лигасида ҳаракат қилган япониялик футболчини мухлислар яхши танишса керак. Ўшанда у "Пахтакор" ва "Бухоро" жамоалари шарафини муносиб ҳимоя қилган. Юртимиздаги дастлабки мавсумида ҳимоячи пойтахт клуби таркибида битта ўйинда майдонга тушиб фақат бир бўлим ўйнаганди. Етарли ўйин амалиётига эга бўлмаган футболчи иккинчи даврада "Бухоро"га йўл олади. Натижада ўзини кўрсата олди. Мураббийнинг ишончини қозонди. 2013 йилда кўҳна шаҳар жамоасида 26 учрашувда иштирок этди. 2014 йилда клубда мураббий ўзгаргач у ҳам кетишга қарор қилди. Умуман олганда у ўзидан ёмон таассурот қолдирмаганди. 

Сато Минори – Ўзбекистонда муваффақиятли ўйнаб кета олган навбатдаги япониялик ўйинчи Сато Минори ҳисобланади. 2014 йилда "Бунёдкор"га "Динамо Брест" жамоасидан келган футболчи жароҳатлари сабаб дастлаб кутилган ўйинни кўрсата олмади. Бироқ, орадан маълум вақт ўтгач ёрқин ўйинларини намойиш этишни бошлади ва тез фурсатда жамоа мухлисларининг ёқимтойига айланди. Бўйи паст бўлишига қарамасдан абжир ҳаракатлари, майдонни яхши кўра олиши, жамоадошларини паслар билан таъминлаб туриши ғалаба қозонилган учрашувларда муҳим рол ўйнарди. 2016 йил қўлга киритилган кумуш медалда ўзининг бетакрор ҳиссасини қўшди. 2017 йил бошида жамоа билан хайрлашган иқтидор соҳиби Қатарга йўл олди. "Қалдирғочлар" таркибида жами 71 учрашувда 10та гол урди. Сато Тошкентни тарк этганидан сўнг бирор жамоада барқарор ўйнай олмади. Қатарнинг "Муайзер", Латвиянинг "Рига", Жанубий Кореянинг "Кванжу" ва Россиянинг "СКА Хабаровск" жамоалари либосларини кийди. Айни пайтда жамоасиз. 

Чо Сук Жае – Доим ўз олдига юқори мақсадларни қўядиган "Локомотив" 2018 йилги мавсум аввалида Чо Сук Жае билан шартнома имзолайди. Кореялик футболчидан кўп нарса кутилганди. Аммо, у рақобатда маҳаллий ўйинчиларимизга ютқазди. Мураббий унга фақат айрим учрашувлардагина имконият берди. ОЧЛ иккинчи турида сафарда "Зобаҳан" билан учрашувда захирадан майдонга тушди. Деярли ҳеч қандай каромат кўрсатмади. Якунда биринчи даврадан сўнг жамоани тарк этди. 2021 йил "Чангвон"да ўйнаганидан сўнг бирор клуб сафида ўйнагани йўқ. 

Томоки Мураматсу – Муборакнинг “Машъал” жамоаси 2017 йилги Олий лига учрашувларининг иккинчи давраси бошланмасидан олдин сафини бир қатор футболчилар билан кучайтириб олади. Одатда легионерлар хизматидан фойдаланишни ҳуш кўрадиган Александр Хомяков жамоага япониялик Томоки Мураматсуни таклиф қилади. Футболчи жамоага келиши ҳусусида таништирув маросимида қуйидагича фикр билдирганди. “Машъал” жамоасининг таклифи мени қизиқтиргани учун иккиланмасдан клубга қўшилдим. Ўзбекистон чемпионати жуда қизиқарли ва барча жамоаларнинг футболчилари профессионал. Масалан, клуб тарбияланувчиси Фозил Мусаев ҳозирда Японияда тўп тепмоқда”. Бироқ, ўйинчининг имкониятларига ва нималарга қодирлигига баҳо бериш учун маълум вақт талаб этиларди. Томоки иккинчи даврада кўп ҳам майдонда кўриниш бермади, маҳаллий футболчилардан яққол ажралиб тургани йўқ. Мавсум якунлангандан сўнг муборакликлар қуйи лигага тушириб юборилди. Футболчи эса якунда жамоа билан хайрлашди. Сўнгги маълумотларга кўра, Томоки 2021 йилдан буён Япониянинг "Шибуя Сити" клубида ўйнаб келмоқда. 

Ким Донг Ҳи – 2018 йилнинг иккинчи давраси бошланиши арафасида Жиззахнинг "Суғдиёна" жамоаси таркибга Жанубий Корея фуқароси саналган Ким Донг Ҳинни жалб қилди. Сергей Лушан ушбу футболчига ишонч билдиришда давом этди. Лекин, оғир жароҳат орттириб олган футболчи қолган баҳсларда иштирок этмади. Амалда клуб у билан келишувни бекор қилди ва кейинги фаолиятига омад тилади. Ўйинчи "Суғдиёна" сафида 9та учрашувда майдонга тушди ва 1та сариқ карточка олди. Кимнинг сўнгги жамоаси "Чангвон" бўлди. 

Диего Барданка - 2021 йил асли испаниялик бўлган, Филиппин фуқароси Барданка "Локомотив"да кўриниш берди. Лекин нима учундир у фақат 4та ўйинда майдонга тушди ва ортига қайтиб кетди. Ўша вақтдаги бош мураббий Микаэль Секейра буни қуйидагича изоҳлаган: "Биринчи навбатда Барданка ҳақидаги саволни ёпмоқчиман. У оилавий шароити туфайли кетган. "Локомотив" катта клуб ва молиявий муаммолари йўқ. Клубда ҳалол одамлар ишлайди, ойлик маошлар вақтида бериб келинмоқда",- деган эди португалиялик мутахассис. Барданка "Локомотив"дан сўнг "Бурирам Юнайтед", "Чонбури" жамоаларида тўп тепди. Ҳозирда "Персис Соло" жамоаси аъзоси ҳисобланади. 2022 йил у Филиппин терма жамоасидан чақирув олди ва 3та ўйинда қатнашди.

Ким Бо Ёнг - 2021 йил Суперлигага чиққан "Турон" таркибни кучайтириш мақсадида кореялик Ким Бо Ёнг хизматидан фойдаланади. Элитадаги дебют мавсумида 22та ўйинда майдонга тушган ҳужумчи 2та гол, Ўзбекистон Кубогида 6та ўйинда 2та гол урган. 2022 йил Про лигада 5та ўйинда қатнашган ва жамоани тарк этганди. Бу  унинг харбий хизматни ўташи билан боғлиқ эди.

Ким Бо Ёнг: "Жанубий Корея футболи топ-даражада, аммо ўзбек футболи даражаси ҳам жуда юқори"

Шунингдек, 2016 йил биринчи даврасида «Навбаҳор»да кореялик Ҳон Ён Чой ҳам тўп тепган. Деярли майдонда кўриниш бермаган, айрим баҳсларда ҳам захирадан ўйинга қўшилганди. Эслаб ўтган шарқий осиёликлардан фақатгина Наоя Шибамура ва Сато Миноригина ишончларни оқлади, холос. ОКМК билан шартнома имзолаган Ариҳиро Сентоку ўзидан қандай таассурот қолдиришини вақт кўрсатади. 

Абдулазиз Искандаров тайёрлади