Ким Бо Ёнг: "Жанубий Корея футболи топ-даражада, аммо ўзбек футболи даражаси ҳам жуда юқори"

Жанубий кореялик футболчининг юртимизда қолиш-қолмаслигини билиш учун у билан боғландик.

– "Турон" жамоасидан қачон ва қандай қилиб таклиф олдингиз?

– Биринчи навбатда, ўзимни легионер сифатида синаб кўрмоқчи эдим ва таклифлар ичидан Ўзбекистон вариантини танлаб, шу ерда фаолият юритишни лозим деб топдим.

– Суперлига ҳақида таассуротларингиз қандай? Жанубий Корея ва Ўзбекистон футболи орасида катта фарқ борми?

– Жанубий Корея футболи топ-даражада, аммо ўзбек футболи даражаси ҳам жуда юқори. Ҳатто ўзбек ва корейс футболчиларининг техникаси бир хил. Бироқ корейс футболида машғулот ва витаминизацияда яхлит тизим мавжуд, шунинг учун ҳам бизнинг футбол европалашган.

– Одатда жанубий кореялик футболчиларни Суперлигамизда кам кўрамиз. Улар бу ерга келишса ҳам, кўп ушланиб қолишмайди. Бунинг сабаби нимада деб ўйлайсиз?

– Ўйлашимча, гап овқат ва об-ҳавонинг ҳар хиллигида. Бошида мен хам қийналган эдим.

– Ўзбекистонга келиб, тўлиқ мавсум ўтказишингизга нима туртки бўлди?

– Мен Ўзбекистони жуда яхши кўраман. Ўзбекистонга меҳрим бўлакча, бу ерда бахтли ҳаёт кечирмоқдаман.

– Жамоада энг яқин дўстингиз ким?

– Фозил Мусаев ва Владислав Касминин.

– Яйпан, Тошкент ва умуман, юртимиз ҳақида таассуротларингиз?

– Туғрисини айтганда, Яйпанда жуда қийналдим, аммо менга Тошкентда корейслар кўплиги жуда ёқди ва ўзбек халқи ҳам жуда мехмондўст экан.

– Ҳозирги кунда  нималар билан бандсиз?

– Айни пайтда Жанубий Кореяда оилам бағрида ҳордиқ чиқаряпман.

– Юртимизда қолиш ниятингиз борми?

– Ўзбекистонни жуда ёқтираман ва ўша ерда қолмоқчиман. Таклифлар ҳам бор, кўрамиз.

Учқунбек суҳбатлашди