"Сараево" бош мураббийи Васоски: "Насаф"нинг 77-рақамдаги футболчиси ҳимоячиларимизга тинчлик бермади"

Босния ва Герцеговинанинг "Сараево" жамоаси спарринг рақиб вазифасини ўтаган баҳсда "аждарлар" катта устунликка эга бўлишди ва 1:0 ҳисобида ғалаба қозонди. Ўйиндан сўнг "Сараево" бош мураббийи Александар Васоски сайтимиз муҳбири Абдулазиз Искандаров билан суҳбатда ўйин ҳақидаги фикрларини билдирди.

"Насаф" яхши жамоа эканлигини ўйинда ҳам исботлади. Биз ушбу учрашувда иккинчи таркиб футболчиларига имконият беришга қарор қилдик. Чунки йиғин давомида барчанинг ҳолатини кўздан кечириб олишимиз керак. Майдонда бироз ёшартирилган "Сараево"ни кўрдингиз. Рақиб устунликни ўз қўлига олди, кўп вазиятлар яратди. Тайёргарлигимиз охирлаб бормоқда. Туркияда кўпроқ учрашувлар ўтказдик. 

Менга "Насаф"нинг чизиқлар орасида тезкорлик билан ўйнаши ёқди. Жисмоний томондан уларга яхши баҳо бераман. Айниқса 77-рақамдаги футболчи (Ойбек Бозоров) ҳимоячиларимизга тинчлик бергани йўқ. Унинг техникаси ва тезлигига қойилман. Биз билан ўйинда у энг яхши футболчи бўлди, дея оламан",- дейди Александар Васоски.

Эслатиб ўтамиз, ўйинда "Насаф" 1:0 ҳисобида ғалаба қозонди.