Самвел Бабаян: "Мавсумнинг энг муҳим ўйинида ғалаба қозондик"

"Бугун мавсумдаги энг муҳим ўйин бўлиб ўтди. Турнир жадвалида келиб чиқиб, чемпионлик баҳси бўлди. Чемпионлик учун дадил қадам ташладик. Ушбу ғалабадан жуда харсандмиз. Қолган ўйинларда ҳам ўз мухлисларимизни қувонтиришга ҳаракат қиламиз.

"Локомотив"га қарши ўйинда дуранг ҳам қониқтирарди. Аммо биз майдонга ғалаба учун тушгандик ва ўз режамизни муваффақиятли амалга оширдик. Биз ҳали расман чемпион бўлмадик. Қачонки бу масалани расман ҳал этсак, ўшанда буни нишонлаймиз.

Мен ўз футболчиларим билан ишлашимдан фахрламан ва завқ оламан. Ҳар қандай мураббий бунақанги юқори даражадаги футболчилар билан ишлашни исташи аниқ", - деб гап бошлади Бабаян.

- БААлик ҳакамлар бугун қандай ишлашди? Умуман четдан ҳакам олиб келиш кимнинг ғояси эди?

- Мен ҳакамлар ишига аралашмайман. Бу ҳақда маълумотга эга эмасман.

- Қайси "Локомотив" кучлироқ эди. Ҳаким Фузайловнинг жамоасими яхшироқмиди ёки Вадим Абрамовникими?

- Мен бу ҳақида бир нарса дея олмайман. Яхшиси клуб раҳбарларининг ўзлари баҳо беришсин. Фурсатдан фойдаланиб ОАВ орқали ўз мухлисларимизни табриклаб қоламан. Барчага раҳмат айтмоқчиман.

Шаҳбоз Беғамов ёзиб олди