Рўзиқул Бердиев: "Бугунги ўйин сифати ва натижаси кутганимиздек бўлди"

Рўзиқул Бердиев: "Ўйинни яхши бошладик. Гол ўтказгунимизча иккита яхши вазиятга эга бўлдик, бироқ кутилмаганда гол ўтказиб юбордик. Шунга қарамасдан йигитлар ишончни йўқотишмади ва ғалабага эришдик. Бугунги ўйин сифати ва натижаси кутганимиздек бўлди. Бу йил стадионимизда ўтказилган сўнгги ўйинда ғалаба қозонганимиз ҳаммага яхши кайфият улашди".

Зафармурод Абдираҳматов: "Уч очко учун майдонга тушгандик ва мақсадимизга эришдик. Баҳс мухлисларбоп бўлди. Барча ўзбекистонликларни ғалаба билан табриклайман".

- Умар Эшмуродовнинг алмаштирилиши нима билан боғлиқ?

- Ғалаба осон бўлмади. Бу жамоа тартибли ўйнашини айтган эдим, бугун ўша гапларнинг исботини кўрдик. Футболчиларни нега алмаштирдим? Ўйин услубимизни ўзгартиришга қарор қилдик. Умар Эшмуродов танаффусда ўйнай олмаслигин айтди. Шу сабабли уни алмаштирдик.

- Умар Эшмуродовнинг ўзгариши жароҳат билан боғлиқ, шундайми?

- Оёғини ушлаб, ўйнай олмаслигини айтди. Шифокорлар кейинроқ футболчи ҳақида маълумот беришади.

- "Насаф" сўнгги баҳсда ғалаба қозонмаса, гуруҳда қолиб кетиши мумкин. "Ал Садд"га қарши баҳсда қандай ўйин кўрсатиш ниятидасиз?

- Бу учрашувда натижа учун ўйнашга мажбурмиз. Очиқ ўйин кўрсатармиз, балки ёпилиб олармиз. "Ал Садд" ўз уйида жуда яхши ҳаракат қилади. Тартибли ўйин кўрсатишимиз керак. Бошқа ўйин натижаси ҳам бизга таъсир қилиши мумкин. Қатар клубига қарши баҳсда фақат ижобий натижага ҳаракат қиламиз.

- Саволим Зафармуродга. "Ал Файсали"га қарши иккала баҳсда ҳам гол ура олдингиз. Гол уришнгизни аввалдан сезганмидингиз?

З. Абдираҳматов: Ўйиндан аввал мураббийимиз вазият бўлса имкониятдан фойдалан, тепиб кўр дегандилар. Биринчи баҳсда ҳам шундай бўлганди.

Рўзиқул Бердиев: Фурсатдан фойдаланиб, мухлисларга раҳмат айтмоқчиман. Бугунги баҳсни стадионда кузатган, телевизордан томоша қилган барча ишқибозларга миннатдорчилик билдираман.