Рональд Куман: “Барса” ғалаба қозониши ҳам мумкин эди, аммо дуранг ҳам адолатли бўлди”

“Ушбу беллашув бир қатор аспектлар бўйича қизиқарли кечди. Ўйлашимча, ўйин бошида биз ўз вазифамизни қийинлаштириб қўйдик. Рақиб бизга катта босим ўтказишига имкон бердик. Дарвозабонга қачон ва қандай вазиятда қисқа паслар билан тўп узатиш кераклигини тушуниб етишимиз лозим. 

Дастлабки 15 дақиқада бизга совуққонлик етишмади. Сўнгра гол урдик, аммо ҳисобга олинмади (Араухонинг зарбасидан кейин тўп дарвоза тўрига бориб тушган бўлсада, ўша вазиятда ҳакамлар “Барса” вакили Брэйтуэйт қўполлик ишлатган деб топишди). Ўша вазиятда қўполлик ишлатилганмиди ёки йўқ билолмай қолдик. Вазиятни борича қабул қилдик. 

Ҳисобда ортда боришмизга қарамай йигитларнинг ўйинга бўлган муносабатини алоҳида таъкидлашни истардим. Дуранг, менимча, адолатли ҳисоб. Бизда ғалабага эришиш учун имконият ҳам бўлди. Аммо “Атлетик” ҳам юқори савияда ўйин кўрсатганидан кўз юмиб бўлмайди. Қолаверса, бундай майдонда тўп тепиш ҳам осон эмас. Бундай ҳолатда қўлга киритган натижадан норози бўлишимиз нотўғри”, деди Куман.