Равшан Ҳайдаров: “Ярим финалга чиқишни мақсад қилганмиз”

Равшан Ҳайдаров: “Ассалом алайкум ҳурматли дўстлар! Шундай нуфузли мусобақадан олдин кўришим турганимдан ҳурсандман. Тайёргарликни декабрдан бошлаган эдик, шундан буён 6та йиғин ўтказдик, бунда 14та назорат ўйини ўтказилди. Йиғинларимизнинг 2таси хорижда Туркия ва Португалияда бўлиб ўтди. Олдимизга қўйилган режа бўйича ишлаб келмоқдамиз. Бу йиғинларда барча ўйинчиларни синаб кўрдик. Бу йиғинлар натижасида ҳозирда 21та ўйинчининг номини эълон қилдик. Ўйлайманки, бу футболчилар мундиалда ўзларини кўрсата оладиган ба бунга муносиб бўлган ўйинчилар.

Режаларимиз: Биз Тошкентда йиғин ўтказмоқдамиз, яқинда “Оқ-тепа” билан назорат учрашуви ўтказдик. Бундан ташқари, Велингтон шаҳрида Панама ёшлари билан ўртоқлик ўйини ўтказамиз. Шу билан Гондурас ёшлар терма жамоасига қарши ЖЧдаги илк ўйинни ўтказиш учун Крайстчерч шаҳрига йўл оламиз.



- ЖЧ олдидан сардор сифатида нима дея оласиз?
- Биздан кўпчилик умид қилмоқда. Йигитлар ҳам буни яхши тушуниб туришибди, минимум мақсадимиз гуруҳдан чиқиш ва 8таликка кириш. Юртимизга ёруғ юз билан қайтамиз деб умид қиламиз.

- Ёшлар ўртасидаги ЖЧ ларда 3 марта қатнашганмиз. Натижаларимиз ривожланиб бормоқда. Буни сизлар ҳам давом еттира оласизми? Бундан ташқари, Виктор Борисов ҳақида икки оғиз фикрингиз?
- Аввало, Виктор Борисовни оила аъзоларига тазия билдирамиз. У инсон кўплаб футболчиларнинг устози эди.
Умид қиламизки, биз бу анъанани давом еттирамиз. Бошқача бўлиши мумин ҳам эмас. Мухлислар бизни ўйинимиз ва натижаларимиздан фахрланиб юришларини хоҳлаймиз. Чиройли ўйинсиз, фақатгина натижа билан кўпчилик қониқмайди. Шунинг учун биз ҳам чиройли ўйин, ҳам натижа кўрсатишга ҳаракат қиламиз. Олдимизга ярим финалга чиқиш вазифасини қўйганмиз. Осиё чемпионатидан кейиноқ йигитлар билан гаплашиб ярим финални мақсад қилиб қўйган эдик. Ҳозирда шу билан яшаб келмоқдамиз, тайёргарлигимиз ҳам шунга монанд бўлмоқда.

- Таркибдан кўнглингиз тўлдими? Бундан ташқари, Бобур Давлатов нега чақирилмади?
- Биз йиғинлар давомида 40-45 нафар ўйинчиларни синаб кўрдик. “Бунёдкор”дан 9 нафар кўпдек туюлади, лекин, бир нечта ўйинчилар бу мавсумдагина бошқа клублардан келишди. Терма жамоага муносиб бўлганлар йиғилди. Жамшид Болтабоевни олиб кетишга умид қилгандик, лекин унинг жароҳати тузалиши жўзилиб кетди. Бобур Давлатов масаласида ташкилий томондан келиша олмадик. Рубин ФИФА кунлари бўлмаганда ўйинчини бермади. Фақатгина 1 мартагина йиғинимиз ФИФА кунига тўғри келди. Бу ёшда бирданига жамоага киришиб кетиш қийин, бунга вақт керак бўлади. Афсуски, Давлатов бирорта йиғинда иштирок этмади, шунинг учун ҳам у якуний таркибга киритилмади.

- Рақибларни қай даражада ўргандингиз?
- Асосан дисклар орқали рақиблар ўйинларини кузатдик. Гондурас Таиландда Қирол кубогида деярли ЖЧга борадиган таркиб билан ўйнади. Рақибларимизда асосан жисмонан кучли ўйинчилар йиғилган. Бизда ҳам болалар ёмон эмас, кучли. Немислар ҳар тарафдан мукаммал жамоа, биз бунга тайёрмиз. Кимлар билан ўйнашимизга йигитларни амалий томондан ҳам, назарий томондан ҳам тайёрлашга ҳаракат қилдик. Фижи терма жамоасига қарши ўйинга Янги Зеландия билан ўртоқлик ўйини ўтказиш орқали тайёрландик. Фижи жисмоний кучга асосланган футбол ўйнайди.

- Натижага сиз жавоб берасиз, мураббийлар штаби ҳақида фикрингиз?
- Мен билан бирга ишлаб келаётган мураббийлардан кўнгдим тўқ. Биз бу мураббийлар билан анчадан буён бир ёқадан бош чиқариб ишлаб келмоқдамиз. Мураббийлар ҳар жиҳатдан менга ёрдам беришмоқда.

- Маълумотларга кўра, мухлислар клуби Янги Зеландияга бормас экан?
- Санжар Ризаев (ЎФФ матбуот хизмати бошлиғи): Виза билан боғлиқ муаммолар борлиги ва жуда узоқлиги учун ҳам катта эҳтимол билан мухлислар клуби мундиалга бормайди.

- Таркибда фақатгина 3та номинал ҳужумчи бор, ЖЧда ҳужум чизиғи билан боғлиқ муаммо бўлмайдими?
- Биз 3 ҳужумчи билан ўйнаймиз. Ҳимоячиларимизда Хуршид Ғиёсов ва Одилбек Хамробековлар бемалол ярим ҳимояда ўйнай олади. Ярим ҳимоячилардан Темур Толиповни ҳужумчи десак ҳам бўлади, бундан ташқари, у таянч ярим ҳимоясида ҳам ўйнай олади. Сардор Азимов ҳам клубида ҳужумда ўйнайди. Биз еса уни қанотда ўйнатмоқдамиз. Жамоада универсал ўйинчилар кўп.

- Жамоадаги руҳий ҳолат қандай? Иккинчи сардор ким?
- Руҳий тайёргарлик яхши. Осиё чемпионатидан кейиноқ йигитларнинг руҳиятини яхшилашга интилиб келдик, ҳар йиғинимизга психолог ҳам чақирилди. Ички муҳитга келсак, ҳар бир жамоа ичида лидер бўлади. Йигитлар ичида суҳбат ва овоз бериш ўтказилган. Бунинг натижасида асосий сардор Жавоҳир Соҳибов, иккинчи ва учинчи сардорларимиз Забихулло Ўринбоев ва Отабек Шукуров. Йигитлар ўзлари бу ўйинчиларни танлашган.

Ж.Соҳибов: Болалар ўзлари мени сардор қилиб тайинлашди, бунинг учун уларга рахмат. Ўйинчилар билан гаплашиб ота-онамиз ва халқимизни юзини ёруғ қилиш учун ҳаракат қилишга келишиб олганмиз.



- “Оқ-тепа” билан ўйинда ўйнаган таркиб ЖЧда асосий таркиб бўладими?
- Йўқ, бу шунчаки ўртоқлик ўйини ва ҳали бу асосий таркиб эмас. Соҳибов ўша ўйинда кичик жароҳати борлиги боис ўйнамаган эди, Миржамол Қосимов еса иситмалагани учун 15 дақиқагина ўйнаган эди. Биз бир ўйинда икки хил тактика билан ўйнаш борасида ишлаб келмоқдамиз. Ўйин давомида тактикани ўзгартиришимиз мумкин. Ўртоқлик ўйинларида аввалига 4-3-3, 20 дақиқадан кейин 4-4-2 га ўтиб ўйнадик.

- Пенальтилар сериясига ҳам тайёргарлик кўрилдими?
- Албатта, “Оқ-тепа” билан ўйиндан олдин ҳисоб қандай тугашидан қатъ назар пенальтилар тепишиш ҳақида келишиб олган эдик.

- Осиё чемпионатидаги охирги ўйиндан қандай хулосалар чиқарилди?
- Ўшанда ЖЧга чиқилди деб йигитлар бироз бўшашишган эди. Ўша ўйин бизга тактик томондан ҳам анча дарс бўлди. Назорат учрашувларида иложи борича ўзимиздан ёши каттароқ футболчилар билан ўйнашга интилдик.
Ҳимоямизнинг заиф томонларини КХДР кўрсатиб берди бизга. Португалия билан 70 дақиқа тартибли ва қарши ҳужум тактикасида ўйнадик, 1 киши кам бўлиб қолганимиздан кейин бироз кучимиз етмади, Уругвай билан еса 2-3 хил тактикани синаб кўрдик.

Толибжон Қосимов