“Қўқон-1912”нинг йиғини якунига етди

Шанба куни Қўқонга бориб, жамоа лагерида бўлиб қайтдик. Тушликдан сўнг соат 16:00да бошланган машғулотни кузатдик. Стадионга борганимизда кўплаб мухлисларга кўзимиз тушди. Машғулот жараёнини кузатиш мақсадида ашаддий ишқибозлар стадионга келмоқда. Лекин бунга оддий хол сифатида қарадик. Чунки бу каби холатларга Андижон, Наманган ва Фарғонада ҳам кўп дуч келамиз. Қўқонлик мухлислар яхши кутиб олди ва ўзларини қизиқтирган саволлар билан мурожаат қила бошлашди. Дарвоқе, яқинда жамоанинг мухлислар клуби ишга тушди. Унга бош қош бўлаётган Қаҳрамонжон Исроилов билан ҳам кўришиб, яқиндан танишдик ва ўзаро суҳбат қурдик. Суҳбатни кейинроқ ҳукмингизга ҳавола этамиз.  

“Қўқон-1912” таркибида ҳозирча асосан маҳаллий футболчилар эканлигини кўриш мумкин. Таниқли номлар январь ойидаги йиғинга келиб қўшилиши кутилмоқда. Бунинг учун бир қатор ўйинчилар билан музокара ўтказилмоқда.
Рустам Абдуллаевнинг айтишича, мазкур йиғин давомида асосан водийлик ўйинчиларни кўздан кечириш эди. Жорий мавсум “Нефтчи” ёшлар жамоасида кумуш медални қўлга киритган Шохруҳ Холматов ҳам қўқонликларнинг машғулотларида иштирок этди. Машғулотларни кузатиш жараёнида дарвозабонлардан биргина Азиз Ашуровга кўзимиз тушди. Андрей Бакланов маълум сабабларга кўра, жамоада эмас. Лекин у яна қайтади. “Аланга”дан келган Азамат Аҳмедовни эса учратмадик.

Бош мураббийга машғуло пайтида Арам Ананян, Муҳсин Низомидинов ва Муҳаммад Иноғомов кўмаклашаётганини кўрдик. Бундан ташқари таниқли мураббий Дилшод Нуралиевнинг ҳам келиши кутилмоқда.
Кеча эрталаб жамоа машғулот ўтказиб бўлганидан сўнг янги йил байрами муносабати билан футболчилар ва ишчи ходимлар шарафига зиёт дастурхони ёзилди. Шу тариқа жамоа қисқа муддатли таътилга чиқди.

Иккинчи йиғин январь ойининг 3-4 санасидан бошланиши кўзда тутилган.

Исломбек Рустамбеков