"Қўқон-1912": Янги футболчилар таништирилди

Ушбу тадбирда жамоа раҳбарияти, мураббийлар штаби, футболчилар ва бир қатор мухлислар иштирок этишди.

Маросим аввалида “Қўқон-1912” жамоаси вице-президенти Бахтиёржон Толипов сўзга чиқиб қуйидаги фикрларни билдириб ўтди:

– Ассалому алайкум, ҳурматли футбол мухлислари. Навбатдаги футбол мавсуми бошланишига ҳам саноқли кунлар қолди. 5 март куни айнан мана шу стадионда 1-тур учрашуви бўлиб ўтади.

Ўтган мавсум биз учун қониқарли якун топди, дейишим мумкин. Ҳар ҳолда, узоқ йиллик танаффусдан кейин Олий лигага қайтиб, чемпионатни 12-ўринда тугатишга муваффақ бўлдик. Бу албатта дебют мавсум учун яхши натижа саналади.

Хабарингиз бор, бизнинг беш йиллик дастуримиз бор. Бунга кўра, 2019 йилги мавсумда “Қўқон-1912” футбол клуби Осиё Чемпионлар лигасида иштирок этишни мақсад қилган. Бунинг учун бугундан пойдеворни мустаҳкам қуриб боришимиз лозим. Шунинг учун ўтган йили жамоамизга ёшлар билан ишлашни яхши кўрадиган тажрибали мураббийи Мурод Исмоиловни таклиф этдик. Шунингдек, таркибда ҳам бир қатор ўзгаришлар юз берди. Жамоадан кетган футболчилар билан бир қаторда янги келган ўйинчилар ҳам бор. Селекция жараёнида асосан ёш футболчиларга эътибор қаратилди.

Бугун янги мавсум олдидан сафимизга келиб қўшилган футболчиларни кенг оммага таништириб ўтамиз.

Ўтган йилги мухлисларимиз ҳар доим бизни қўллаб-қувватлаб келишди. Бунинг учун уларга миннадорчилик изҳор этамиз. Ўйлаймизки, бу йил ҳам улар бизни ёлғизлатиб қўйишмайди.

Шундан кейин жамоамиз сафига келиб қўшилган янги футболчилар: Ғайрат Ҳасанов, Отабек Зокиров, Достон Турсунов, Алишер Зиявуддинов, Миржалол Қурбонов, Абдуллох Олимов, Наврўз Алимов, Сардор Қаҳҳоров, Абдул Азиз Юсупов ва Азизхон Ибрагимовлар кенг оммага расман таништирилди ва уларга тантанали тарзда исмлари туширилган футболкалар топширилди.

Ким қайси рақамда тўп суради: Миржалол Қурбонов – 4, Отабек Зокиров – 7, Наврўз Алимов – 11, Азизхон Ибрагимов – 18, Сардор Қаҳорров – 19, Достон Турсунов – 20, Ғайрат Ҳасанов – 21, Алишер Зиявуддинов – 25, Абдуллох Олимов – 28, Абдул Азиз Юсупов – 33.

Янги футболчилар таништириб бўлингач, бу йилги баҳсларда иштирок этиши мумкин бўлган, аниқроғи, ПФЛ томонидан рўйхатдан ўтган барча футболчилар мухлисларга тантиштириб ўтилди.

Шунингдек, ушбу мавсумда жамоамиз мураббийлар штабида ҳам катта ўзгаришлар содир бўлди. Ўтган йили ўринбосарларимизни бошқарган Муҳсин Низомиддинов ёрдамчи мураббий сифатида иш бошлади. Жисмоний тайёргарлик бўйича мураббий лавозимини тажрибали мутахассис Сергей Ковшов эгаллади. Ёшлар билан ишлашда катта тажрибага эга бўлган мутахассис Мақсуд Умаров ҳам эндиликда жамоамизда фаолият олиб боради. Ўринбосарлар таркибини эса Қўқон футболида ўзига хос ном қолдирган Муҳиддин Абдувалиев бошқариб боради. Унга яна бир собиқ футболчи Раҳматулло Иноғомов ёрдам беради. Ушбу мураббийлар ҳам мухлисларга таништирилди.

Тадбирнинг яна бир қисми мухлислар билан савол-жавоб тарзида ўтди. Унда стадионга ташриф буюрган кўп сонли ишқибозлар клуб раҳбариятига ўзини қизиқтирган саволлари билан мурожаат этишди.

Маросим сўнггида футболчилар эсдалик учун суратга тушишди.