"Қўқон-1912": Эртага "Нефтчи" билан ўйнаймиз

Жамоамизнинг бугунги машғулотлари поёнига етди.

Футболчилар эрталаб жисмоний тайёргарликка мўлжалланган машқларни бажарди. Тренажёр залида кечган машғулотлар 2 соат давом этди. Тушликдан кейин эса “Марказий” стадионда тўп билан шуғулланилди. 

Кучли шамол эсишига қарамай, мухлисларнинг бугунги машғулотларга ҳам ташриф буюрганини эътироф этиш лозим. Улар ҳар бир кунги машғулотни диққат билан кузатиб бормоқда. Шунингдек Қўқон шаҳар ҳокими Абдуллаев Акромжон Анорқулович  ҳам стадионга ташриф буюриб, машғулотни четдан туриб кузатиб борди. Бу эса футболчи ва стадионга келган ишқибозларни кайфиятини кўтаргани аниқ. 

Машғулотларда жами 24 нафар футболчи иштирок этмоқда. Ҳимоячи Баҳром Юлдашев билан ярим ҳимоячи Нодирбек Қўзибоев бетоблиги сабабли шуғуллана олмаяпти. Таркибни кучайтириш учун бир қатор тажрибали ўйинчилар билан музокара олиб борилмоқда. 

Мураббийлар режасига кўра, жамоа эртага Фарғонада “Нефтчи” билан синов-назорат учрашувини ўтказади. Мазкур учрашув "Қиргули"стадионида соат 14:00да бошланишини кўзда тутилган. 

Ўйиндан сўнг бу ҳақда батафсил маълумот берамиз.