"Қўқон-1912": Абдуқодиров, Юлдашев, Лепасович кетди, Ильин келди

Пойтахтдаги муҳташам “Ўзбекистон” меҳмонхонаси жамоанинг вақтинчалик қароргоҳи вазифасини ўтаб бермоқда. Раҳбарият жамоа учун барча шароитларни яратиб берган. Ўз навбатида мураббийлар штаби ҳам курашчан жамоа шакллантириш мақсадида ишламоқда.

Хабарингиз бўлса керак, “Қўқон-1912” анънавий тарзда ўтказилиб келинадиган ПФЛ Кубоги турнирида иштирок этмоқда. Тақвимга кўра, бугун жамоа ўрин олган “В” гуруҳида учрашув ўтказилмади. Эртага жамоалар 3-тур баҳсини ўтказади. Хусусан қўқонликлар гуруҳ пешқадами бўлиб турган “НБУ-Осиё” жамоасига қарши ўйнайди. Ушбу ўйин Чилонзордаги сунъий-қопламали майдонда, соат 12:30да бошланиши кўзда тутилган. Ўз олдига ҳар бир баҳсда ғалаба қозонишни вазифа қилиб қўйган “Қўқон-1912” табиийки ушбу турнирда ҳам ижобий натижа қайд этиш учун курашмоқда.

Таркибдаги ўзгаришларга тўхталадиган бўлсак, бунгача жамоа ўқув-йиғин машғулотларида иштирок этган ҳимоячи Баҳром Юлдашев ва ҳужумчи Абдулатиф Абдуқодиров куни-кеча клуб лагерини тарк этди. Шунингдек маълум муддат жамоада кўрикда бўлган легионер ҳужумчи Александр Лепасович ҳам эндиликда ўзига бошқа жамоа топадиган бўлди.

Бунгача "Машъал", "Қизилқум" ва "Бухоро" каби жамоаларда ўйнаган ҳимоячи Илья Ильин бугунги кунда "Қўқон-1912" кўригида булиб турибди. Агарда унинг ҳатти-харакатлари мураббийларга маъқул келса, шартнома имзоланади.

Таркибни янада кучайтириш ва чемпионат стартига қадар ҳужумкор ўйинни шакллантириш борасида мураббийлар штаби шуғулланмоқда. Ўз вақтида Ўзбекистон миллий терма жамоаси ва “Пахтакор” клуби сафида ўйнаган ва тажрибали футболчи билан музокара ўтказилмоқда. Агарда ҳар икки томон қониқарли келишувга эриша олса, бу ҳақда батафсил маълумот берамиз. Селекция ишлари мавсум стартига қадар давом этади.