Қашқадарёдан мухбиримиз хабар қилади, бугун Қаршида "жанг" бўлади

Хабарингиз бор, айни пайтда сайтимизнинг уч нафар ходими Қарши шаҳрида ижодий сафар билан бўлиб турибди. Кеча иккала жамоа ҳам ўйинолди якуний машғулотини ўтказди. Мухбиримиз Шаҳбоз Беғамовнинг айтишича, жамоалар ўйинга тайёр ва бугун Қаршида "жанг" кечиши кутилмоқда. Аслида шундай бўлиши ҳам керак, ахир ўртага ОЧЛ йўлланмаси тикилган.

Бу ўйинда ҳеч бир жамоани дуранг қониқтирмайди, иккала клуб ҳам ғалаба учун майдонга тушади. Хусусан "Насаф" учун бугунги беллашув алоҳида аҳамият касб этади. Чунки жамоа ўз тарихида иккинчи бор кумуш медалларга эга чиқишга жуда яқин турибди. Ўз навбатида "Пахтакор" учун ҳам бу оддий ўйин эмас. Агар жамоа Шота Арвеладзе қўл остида ОЧЛга йўл ола билмаса, кейинчалик кўплаб танқидий фикрлар остида қолиб кетиши мумкин.

Хуллас, иккала жамоа ҳам бугунги тўқнашувга тайёр. Биз эса ҳам "Насаф", ҳам "Пахтакор"дан чиройли, шиддатли, шу билан бирга мазмунли ўйин кутиб қоламиз. Айни пайтда Қаршида бўлиб турган футбол ихлосмандларини соат 14:00да бошланадиган муҳим беллашувга чорлаймиз.  Стадионга бора олмайдиганлар эса мазкур баҳсни "Спорт" телеканали тўғридан-тўғри кузатиш имкониятига эгалар.

Якунда иккинчи ўринни ким олмасин, биз бугун фақат чиройли ўйин кутиб қоламиз. Ўйлаймизки, ҳакамлар ҳам ўйинни адолатли тарзда бошқариб, ўз шаъниларига доғ туширишмайди. Учрашув бошланишига саноқли соатлар қолмоқда, келинглар ҳаммамиз шиддатли футбол гувоҳига айланайлик.