Превью. Сўнгги икки Осиё Кубоги ғолиблари ўртасидаги ўйин

Илк турда иккала жамоа ҳам уч очкога эга бўлди. 2007 йилда Осиёда тенгсиз бўлган Ироқ Иорданияни 1:0 ҳисобида таслим қилди. 2011 йилда қитъа чемпиони бўлган японлар эса мусобақа дебютанти Фаластин терма жамоаси дарвозасига жавобсиз 4та гол урди - 4:0.

Япония ҳам, Ироқ ҳам ўз тарихида 8-марта ОК финал босқичида қатнашмоқда. "Самурайлар" тўрт бор Осиёда тенгсиз бўлишган (1992, 2000, 2004 ва 2011 йилларда). Ироқ эса юқорида ёзилганидек 2007 йил Осиё кубогини қўлга киритган.

Бу икки жамоа ўзаро 9 марта тўқнаш келган. Ироқ ҳисобида 3та ғалаба бор, Япония 4 бор зафар қучган. Қолган икки учрашувда дуранг натижаси қайд этилган. Тўплар нисбатида "самурайлар" устунликка эгалар - 11:8.

Ушбу жамоалар 2000 йил Ливанда ўтган Осиё Кубогида тўқнаш келишган. Чорак финал доирасида ўтган ўша баҳсда японлар 4:1 ҳисобида ғалабага эришишган. Кейинчалик ўша мусобақада Япония чемпион бўлган.

Дастлабки турда Ироқ сафида Ёсир Қосим, Амжад Ҳалаф ва Ало Абдул Заҳро сариқ карточка олишди. Бу футболчилар агар иккинчи турда огоҳлантириш олса гуруҳдаги охирги ўйинни ўтказиб юборишади. Хавьер Агирре бошчилигидаги Япония терма жамоасининг ҳеч бир ўйинчиси 1-турда сариқ карточка олмади.

Ироқ - Япония
16 январь 2015. Брисбен
Бош ҳакам: Алиризо Фағони (Эрон)
Қанот ҳакамлари: Ризо Суҳандон (Эрон), Муҳаммад Ризо Абулфазли (Эрон)
Тўртинчи ҳакам: Хеттиканканаге Перера (Шри-Ланка)
Бешинчи ҳакам: Палита Хематунга (Шри-Ланка)


Нарзулла Сайдуллаев