Педру Морейра: "Биз орзумизда яшамоқдамиз"

"Барчага хайрли тун. Биз қийин баҳс бўлишини биламиз. Айниқса сафардаги баҳсдан сўнг. "Ал Ҳилол" ўта кучли жамоа. Рақибимиз ҳар доим ўйинни назорат қилишга ва тўпга эгалик қилишга интилади, айниқса ўз уйида ўйнаётганида. Рақибимиз жуда кам гол ўтказиб юборади, ҳаттоки Элит лигада.

Биринчи учрашувда биз "Ал Ҳилол"ни тўхтатиб қола олдик. Тошкентда биз ажойиб ўйин ўтказгандик ва бундай кучли рақибга етарли муаммолар яратгандик. Эртага яхши футбол кўрсатишга ва имкон қадар ўз мақсадимизга эришишга ҳаракат қиламиз" - дея фикр билдирди Педру Морейра эртанги учрашув олдидан.

- Жорже Жезуснинг жамоасига қарши тайёргарлик кўриш қанчалик қийин кечди? Сиз бунга қадар "Брага" ва "Порту" жамоаларида ишлаган вақтингизда Жорже Жезус билан тўқнаш келгансиз... 

- Биринчи навбатда шуни таъкидлаб ўтишимиз керакки, биз жуда кучли мутахассис ҳақида фикр билдиряпмиз. Жорже Жезус ушбу мусобақада иштирок этаётган жамоаларнинг мураббийлари ичида энг кўп соврин ютган мутахассис ҳисобланади. Мен бу ҳақда ўтган ўйин олдидан айтгандим. Бу мураббийнинг даражаси қандай эканлигини аниқлаб беради. Шунингдек, Жорже Жезус ўтган мавсум "Ал Ҳилол" билан мағлубиятсиз серия бўйича жаҳон рекордини ўрнатди. Жорже Жезус мен учун янги инсон эмас. Мен у билан бунга қадар ишлаганман, аммо бу ҳақда гапиришни истамайман(кулади). Мен Жезусни қаттиқ ҳурмат қиламан, аммо биз рақиблармиз. Биз янги жамоа сифатида эртага майдонда икки йилдан буён бирга ўйнаб келаётган таркиб ва жамоага қарши майдонга чиқамиз. Биз буни тан олишимиз керак.

Ўтган баҳсда биз ажойиб ўйинимиз билан "Ал Ҳилол"ни таслим эта олдик. Рақибга имконият бермадик. Тошкентдаги баҳсда рақибимиз бор-йўғи битта аниқ зарба амалга оширган эди. Эртага эса умуман бошқа сценарий остида ўйин бўлади. Улар ўз уйида қандай ўйнашидан хабардормиз.

- "Ал Ҳилол" ўз уйида "даҳшатли" ўйин намойиш этади, аммо дастлабки учрашувда жамоангиз ғалаба қозонган. Тошкентда қайд этилган натижа футболчиларингизга руҳий томонлама устунлик бермоқдами?

- Эсласангиз, ўтган ҳафта мендан "Ал Ҳилол"га қарши қандай ўйин услубини танлайсизлар, ҳимоявийми ёки ҳужумкор деб сўрашган эди. Биз барча сценарийларга тайёргарлик кўрамиз. Бу Элит ОЧЛнинг плей-офф босқичи ва рақиблар даражаси ўта юқори. Биз узоқ давом этадиган мавсумга тайёргарлик кўрмоқдамиз, аммо дастлабки ўйинларимиз Элит ОЧЛга тўғри келди. 

Футболчилар бирлашди ва бир оила бўла олди. Ўз кучимизга ва намойиш этаётган футболимизга ишондик. Биз аллақачон ушбу ҳолатда ғолибмиз. Биз плей-офф босқичига энг сўнгги жамоа бўлиб йўл олдик. Жадвалда саккизинчи ўринни қўлга киритгандик. "Ал Ҳилол" эса гуруҳ босқичини биринчи ўринда якунлади. Келажакда ҳам шундай давом этишимиз керак. Ўйин давомида ўзгаришларга қўл урамиз ва янгича йўналишларни излаймиз. Биз келажагимиз учун курашишимиз керак.

Жонатан айтган гапларга ҳам тўхталиб ўтсам. "Ал Ҳилол" жамоасининг бир нечта уй учрашувларини томоша қилдим. Мухлислар ўз суюклиларини яхши қўллаб-қувватлашар экан. Эртага бизга қийин бўлади, лекин "Пахтакор" мухлислари ҳам стадиондан туриб бизни қўллаб-қувватлашади. Бу биз учун жуда муҳим. Мен ўзбекистонлик инсонлар билан яқинроқ бўла олдим ва бу мен учун энг катта ғалаба. 

- Биламан, сиз ўйинчиларнинг индивидуал маҳоратига эътибор беришни хуш кўрмайсиз, сабаби футбол жамоавий ўйин. "Ал Ҳилол" жамоасидаги қайси футболчиларни индивидуал тарафлама кучли деб ўйлайсиз? Қайси футболчи "Пахтакор" учун кўпроқ хавф туғдириши мумкин?

- Ушбу мавзу бўйича гапирадиган бўлсам, суҳбатимиз тонгга давом этади. Мен дарвозабондан бошлаб то футболчига қадар гапира оламан. "Ал Ҳилол" минтақадаги энг кучли жамоалардан бири. Буни ҳамма билади. Биз рақибни ўрганиб чиққанмиз. "Ал Ҳилол" таҳлил қилиш қийин эмас, аммо уларни тўхтатиб қолиш қийин. Биз рақибнинг кучли ва кучсиз томонларини ўрганиб чиқдик. Биз охиригача курашишимиз керак бўлган вазиятдамиз. Мен бу тарифни ишлатишни истамайман, аммо биз ҳозир, мен клубга энди келган давримдаги орзуда яшамоқдамиз. Биз ҳозир орзумиз бўлган воқеийликдамиз. Мен клубга келганимда кўп бўлмади, мен бу ердаги янги мутахассисман. Мен клубни ўргандим, кейин футболчиларни, мамлакатни. Мен португалияликман, аммо Ўзбекистон байроғи учун ҳам жавобгарман. Биз ҳозир бу жараёндан роҳатланишимиз керак ва шунчаки ўзимизнинг футболни намойиш этсак бўлгани.

- "Пахтакор" учун эртанги учрашувдаги энг қийин жиҳат қайси бўлиши мумкин? Масалан, эрта гол ўтказиб юбормаслик ва ҳоказо.

- Менинг фикримча, мухлислар яратадиган атмосферада ўйнаш. "Ал Ҳилол" мухлислари ўз жамоасини яхши қўллаб-қувватлайди. Эртага мухлислар бизга катта босим қилишади. Биз ушбу босимни енгиб ўтишимиз керак. Буларнинг барчаси "Пахтакор" жамоасининг келажаги учун қилинмоқда.

- "Пахтакор" жамоасининг ҳужумдаги ўйини асосан Фламарион ва Риаскос атрофида қурилмоқда. Захира ҳақида нима дея оласиз? Ўйинда бурилиш ясаш керак бўлса-чи?  Чунки аввалги иккита ўйинда “Пахтакор” ғалаба қозонаётгани ҳисобига захира потенциалини кўриш имкони бўлмаганди...

- Ҳа, албатта. Агар қайсидир футболчи ўйинни кучайтира олмаганида, у жамоа билан бирга бу ергача келмасди. Биз 11 киши бўлиб ўйнаймиз. Муҳими, гол ўтказиб юбормаслик, гол ўтказиб юбормасак ғалабага яқинроқ бўламиз. Ҳатто ҳужумчилар ҳам ҳимояга ёрдам бериши керак. Мен ўз жамоам ўйини ҳақида қайғ ураман. Бизнинг режамиз ва услубимиз қандай бўлиши ҳақида. Биз нафақат эртанги баҳс, балки Суперлига баҳсларига ҳам тайёргарлик кўриб боряпмиз. Бизни олдинда узун мавсум кутиб турибди ва мен ўз жамоамга тўлиқ ишонаман. Мавсум давомида биз қандай ўйин намойиш этишимиз ва нималарга қодир эканлигимизни билиб оласиз. Эътибор учун барчага раҳмат.