"Пахтакор" хотира турнири ғолиби!

Финалда БЎСМ-16 билан тўқнаш келган Рустам Қурбонбоев шогирдлари рақибдан фаолроқ ўйнаган ҳолда 2:1 ҳисобида ғалаба қозонди. Беллашувда "Пахтакор" бир оз устунликка эга бўлди. Дастлаб БЎСМ-16 футболчиси жарима зарбасини ажойиб амалга ошириб, ҳисобни очди. Бунга биринчи бўлим ўрталарида Сарвар Солиев жавоб қайтарди. У рақиб дарвозабонини алдаб ўтиб, тўп киритди. Иккинчи бўлимда ҳар икки жамоа бир қатор кескин вазиятларни юзага келтирди.

Афзал Холмуҳаммедов БЎСМ-16 дарвозабонини яккама-якка ҳолатда доғда қолдирди. Бу ҳисоб ўйин охиригача ўзгармади. Шундай қилиб, 1999 йил тарбияланувчилари мусобақа ғолибларига айланишди. Ярим ҳимоячи Бобур Асқаров энг яхши ярим ҳимоячи сифатида эътироф этилди. Финал якунига етгач, турнир совриндорлари диплом ва медаллар билан тақдирланди. "Бунёдкор" 4, "Машъал" 3-поғонани эгаллади. "Пахтакор"га диплом ва медаллар билан бир қаторда мусобақа кубоги ҳам топширилди.