"Пахтакор": Рақибимиз "Нефтехимик"

29 январь куни "Нефтехимик" билан учрашув бўлиб ўтади. Нижнекамск шаҳрида 1991 йил ташкил этилган клуб айни пайтда Россия миллий футбол лигасида иштирок этади. Мавсумнинг биринчи қисмини бу жамоа 18-ўринда якунлаган. Бош мураббий сифатида Рустем Хузин ишлаб келмоқда. Вагиз Галиулин ва Даврон Мирзаев сингари ўзбекистонлик футболчилар яқингача "Нефтехимик" сафида фаолият юритишганди. Нижнекамск шаҳри клуби бундан аввалги назорат ўйинида "Факел"ни 1:0 ҳисобида мағлубиятга учратди.

Жамоамиз эса "Папиллон" меҳмонхонасига қарашли майдонда машғулотлар ўтказишда давом этяпти. Жамоа менежери Самвел Бабаян ва мураббийлар штаби бошчилигида футболчилар жисмоний имкониятларни ошириш билан бирга энди ҳафталик ўйинлар ритмига тушишга ҳаракат қилишади. "Пахтакор" ва "Нефтехимик" жамоалари ўртасидаги назорат баҳси 29 январь, чоршанба куни Тошкент вақти билан соат 20:00да бошланади.