Паслар даҳоси: Хавининг Эл-Класикодаги энг яхши 5 ўйини

Бу афсонавий тўқнашувда Йохан Кройфф, Диего Марадона, Роналдиньо, Лионель Месси каби сеҳргарлар мўъжиза яратган, аммо "Барселона" ва "Реал"нинг рақобати тарихида Хави Эрнандеснинг ҳам катта ўрни бор. У ўйинга ритм берган, уни бошқарган ва футболни қисқа паслар симфониясига айлантирган инсон эди.

Қуйида Хавининг Эл-Класикодаги бешта энг зўр ўйинини эслаймиз. Дарҳақиқат, Сизлар бизнинг фикрларимизга қўшилмаслигингиз ҳам мумкин.

"Барселона" – "Реал" 5:0 (2010 йил 29 ноябрь)

Бу ўйин "Реал" учун "Эл-Класикодаги энг катта ҳурматсизлик" деб номланган. Хосеп Гвардиола бошчилигидаги "Барса" эҳтимол, ўз тарихидаги энг зўр футболини намойиш этган, Хави эса бу спектаклнинг дирижёри бўлган.

"Камп Ноу"даги учрашув мадридликларнинг 5:0 ҳисобидаги мағлубияти билан якунланган. Хави 10-дақиқада ҳисобни очган – "бланкос" жарима майдонида вазиятни маҳорат билан ҳал қилган. Лекин бу ўйиндаги энг муҳими – унинг тўпни назорат қилиши, доҳийона паслари ва майдон марказидаги хотиржамлиги эди. Бу кечада "Барса" шунчаки ғалаба қозонмади – у "Реал"ни ер билан яксон қилди.

"Реал" – "Барселона" 2:6 (2009 йил 2 май)

Бу ўйин Пеп Гвардиола давридаги "Барса" устунлигининг рамзига айланган. Ҳамма "Реал" чемпионлик учун курашади деб ўйлаган, аммо каталонияликлар 6:2 ҳисобида ғалаба қозониб, соврин йўлидаги барча баҳсларга нуқта қўйишган.

Хави бу ўйинда тўртта голли пас бериб, Эл-Класико тарихидаги рекордни ўрнатган. У Тьерри Анри, Карлес Пуйол ва Лионель Мессига голли паслар узатиб, майдонни ажойиб кўра олиш қобилиятини намойиш қилган. Бу келажак футболи эди, "Реал" эса чинакам ожиз кўринган.

Испания Кубоги финали: "Реал" – "Барселона" 0:3 (2011 йил 20 апрель)

Бу ўйин "блаугранас" мухлисларининг ёдида абадий қолади. Жозе Моуриньо бошчилигидаги "Реал" 0:5 учун қасос олишни хоҳлаган, аммо "Барса" яна бир бор кучлироқ эканини кўрсатган.

Хави жамоа юраги эди – ҳужумларни бошлаб, мураккаб вазиятларда ҳам идеал ечим топа билган. У Педрога биринчи гол олдидан ҳал қилувчи пас берган. Кейин эса Месси икки марта дарвозани ишғол қилган. "Реал" ўз майдонида, ўз мухлислари қаршисида фалокатли мағлубиятни қабул қилиб олган.

Испания Суперкубоги: "Барселона" – "Реал" 3:2 (2011 йил 17 август)

Бу ўйин Гвардиола ва Моуриньюнинг "абадий тўқнашуви" рамзи бўлди. Жуда кескин, провокацияларга бой ва жанжал-мунозаралар билан тўла ўйин бўлган.

Хави майдондаги тартибсизликка қарамасдан, тинчлик намунаси бўлиб қолган. У жамоасини ҳисобда олдинга олиб чиқадиган голни урган. Каталонияликлар ғалаба қозонган, аммо бу ўйин майдондаги футбол билан эмас, балки ўйин охиридаги жанжал – Моуриньюнинг Тито Виланова кўзига бармоқ билан ишора қилиши билан эсда қолган.

Чемпионлар Лигаси: "Реал" – "Барселона" 0:2 (2011 йил 27 апрель)

2011 йилги Чемпионлар Лигаси ярим финали – Гвардиола ва Моуринью ўртасидаги тактик жиҳатдан энг қийин тўқнашувлардан бири бўлган. "Сантьяго Бернабеу"даги биринчи ўйинда "Барса" 2:0 ҳисобида ғалаба қозонган, Хави эса ҳар доимгидек марказнинг "мияси" бўлган.

Унинг совуққонлиги сабабли "Барселона" "Реал"нинг босимидан осонлик билан чиқиб кета олган. Хави имкониятлар яратган, ҳимояни кесиб ўтувчи паслар йўллаган ва ўйиннинг ритмини белгилаб турган. Мессининг икки голи эса барчасини ҳал қилган. "Барса" финалга чиққан ва кейинчалик турнир ғолиби бўлган.

Хулоса ўрнида:

Бу ўйинлар – Хавининг Эл-Класикода қилган ишлари унинг футболга қолдирган меросининг бир қисми холос. У шунчаки футболчи эмас, футболни юрак билан ҳис қилиб ўйнаган рассом.

Гвардиоланинг "Барселона"си тарихдаги энг зўр жамоалардан бири, Хави эса унинг алмаштириб бўлмас меъмори сифатида ёдда қолади. Футболчилик фаолияти тугагач ҳам у бу тарихнинг бир қисми бўлди, фақат мураббий сифатида. У "Барса"ни ЛаЛига чемпиони қилгани, катта ютуқ, гарчи бу мухлислар орасида катта танқид остига олинса-да.

Балким, келажакда у бошқа жамоада тажриба орттириб, яна "Барселона"га катта номли мутахассис сифатида қайтар. Лекин бир нарса аниқ – Хависиз Эл-Класико бошқача бўлади, аммо унинг буюклиги абадий ёдда қолади.

Айтганча, Эл-Класикога роппа роса 48 соат қолди. 27 апрель куни 01:00да дунё иккига бўлиниб, бу ўйинни томоша қилади.