Акмал Рустамов: "Бешинчи ўриндан ҳам юқорида бўлмоқчимиз"

- Ўйин ҳақида фикрингиз?

- Учрашув қийин ўтиши билардик, чунки "Машъал" иккита ўйиндан бери ютқазяпти. Ҳар қандай жамоа икки мағлубиятдан сўнг учинчи баҳсга янада жиддий ҳаракат қилади. Оғир ўйинда ғалаба қозондик ва бунинг учун йигитларга раҳмат айтаман. Бугун шогирдларим берилган кўрсатмаларни тўғри бажаришди. Бизни совуқ ҳавога қарамай стадионга келиб қўллаб турган мухлисларга алоҳида раҳмат. Ўйинимиз яхши чиқди деб ўйлайман ва 2:0 ҳисобида зафар қучдик.

- Бугун негадир Олексий Шебетуннинг ўйини чиқмагандек. Ўтган сафар у берилган вазифани бажарса бўлди дегандингиз.

- Ўйинлар оралиғи кам бўлмоқда. Аввалги тур "Андижон" билан баҳсда кўп куч йўқотдик. Шу боис биринчи навбатда жамоани жисмоний жиҳатдан бу ўйинга тайёрлашга ҳаракат қилдик. Шебетун ҳам бошқалар қатори ҳаракат қиляпти. Жамоамизда унинг ўрнини тўлдира оладиган ҳужумчилар бор. Бугун Шоҳруз Норхонов захирадан тушиб ўзини кўрсатди ва гол урди. Футболда шу: кимнинг ўйини чиқмаса, захирадан ўйинга қўшилган футболчи унинг ўрнини тўлдириши ва шу орқали жамоа бир-бирига ёрдам бериши керак бўлади.

- Қисқа муддат ҳаракат қилган Ғиёсжон Ризақулов ҳақида нима дея оласиз?

- Ғиёсдан умидимиз катта. У олимпия терма жамоасида ўйнайди. Яхши ҳаракат қилса, ўйин вақти ошиб боради ва бир кун келиб жамоамиз етакчисига айланади. Ҳаммаси ўз қўлида. Айтиб ўтганимдек, ундан умидимиз катта.

- Жамоа беш бор стандарт вазиятни амалга ошириб, шундан фақат биттасида фойдаланди. Бу нима дегани?

- Нафақат стандарт, балки тўпни аутдан киритиш, бурчак тўплари, жарима зарбалари - хуллас ҳаммаси бўйича ишлаяпмиз. Бирданига ҳаммаси зўр бўлиб қолмайди, секин-аста келади деб ўйлайман. Худо хоҳласа, ўхшамаган нарсаларни кейинги баҳсларда ўхшатамиз.

- "Қизилқум" жамоасининг бу йилги мақсади ҳақида?

- Бу ҳақда биринчи турдан кейин ҳам сўрашганди. Раҳбарият жамоамиз олдига бешинчи ўрин вазифасини қўйган, лекин биз янада юқорироқдан жой эгаллашни хоҳлаймиз. Бунинг учун охиригача ҳаракат қиламиз.