Ўзбекистон U-17 терма жамоаси бош мураббийи навбатдаги ғалабадан сўнг нималар деди?

Аввало барчани қийин ғалаба қўлга киритилгани билан табриклайман. Сабаби бугунги ўйини осон ўтди демаган бўлардим. Чунки БАА ҳам ушбу ёш тоифада Осиёнинг кучли жамоалардан бири эди.

Ўйин ҳақида келадиган бўлсак, БААни ўйиндан олдин ўрганиб чиққанимизда, жамоа асосан ҳужум бошлашда муаммоларга учрашини сезгандик. Биринчи бўлимдаги тактик режамиз бўйича биз юқори прессинг қилиб, рақиб майдонида кўпроқ ҳаракат қилиш эди. Асосий вазифа кўпроқ гол уриш эди биринчи бўлимда ва буни футболчилар яхши уддалашди деб ўйлайман. Рақибга ҳужум бошлашда ҳеч қандай имконият қолдирмадик. Ўзимиз эса тезкор ҳужумларга ўтиб, кўплаб голли вазиятлар яратдик.

Биринчи бўлимдан сўнг футболчиларга бўшашмасликни ва иккинчи бўлимда янада ҳужумкор футбол кўрсатиш бўйича кўрсатма бердик. Бироқ бу ёш билан боғлиқ бўлса керак, 3:0 дан сўнг шогирдларим ўйинни эрта тугатиб қўйишди. Шу сабабли иккинчи бўлимда ўйинимиз бироз ўхшамади. Шунингдек, кейинги ўйини ўйлаган ҳолда таркибда бир нечта ўзгаришлар қилдик.

Турнир анча оғир ўтмоқда, бу вақтда футболчилардан тўғри фойдаланиш ҳам жуда муҳим. Шунинг учун ҳар бир учрашувда барча футболчиларнинг ҳолатини мунтазам текшириб бормоқдамиз.