Ўзбекистон U-17 сардори Лазизбек Мирзаев: "Жаҳон чемпионати ҳар бир футболчи учун катта мотивация ва имконият ҳисобланади"

Кеча мазкур мусобақанинг гуруҳ босқичи учрашувларига қуръа ташланди. Якуний натижаларга кўра вакиллримиз Испания, Мали ва Канада билан бир квартетдан ўрин олди. Сайтимиз мухбири Абдулазиз Искандаров бу борада терма жамоамиз сардори Лазизбек Мирзаевнинг фикрлари билан қизиқиб кўрди. 

"Қуръа ташлаш маросимида Испания терма жамоасини кутган эдим. Барибир Европани топ жамоаларидан бири тушиши аниқ эди. Уларнинг катталар терма жамоалари қандай натижалар қўлга киритганини, Жаҳон ва Европа чемпионлари бўлганини биламиз. Шахсан ўзим уларни кўп кузатганман. Канадада ҳам футболга эътибор яхши, дея оламан. Совуқ мамлакат бўлгани учун Индонезияда қийналишса керак. Африка жамоалари эса ҳар бир ёш тоифасида кучли ҳисобланади. Учта терма жамоа ҳам бир-бирига етарлича қаршилик кўрсатади, дея оламан. 

Бизга ким тушишидан қатъий назар ҳар доим ғалаба учун майдонга чиқамиз. Бу барчамиз учун илк Жаҳон чемпионати. Турнирдан кўп нарса кутмоқдамиз. Мақсадимиз финалгача етиб бориш ва чемпион сифатида ортга қайтиш. Бу осон бўлмайди. Барчамиз олдимизда қандай ишлар борлигини сезиб турибмиз. 

Жаҳон чемпионати футболчилар учун катта имконият ва мотивация ҳисобланади. Бундай савиядаги турнирда қатнашиш ҳар доим фойда беради, деб ўйлайман. Мусобақада имкон қадар жамоамга ёрдам беришга ва кўп гол уришга ҳаракат қиламан. Камида пасларим билан самара келтиришни истайман",- дейди Лазизбек Мирзаев.