Ўзбекистон U-16 ўсмирлари иккинчи ўйинда ҳам БАА ўсмирларига мағлуб бўлди

Темур Олимхўжаев бош мураббийлигидаги Ўзбекистон U-16 ўсмирлар терма жамоаси айни дамда БААнинг Дубай шаҳрида йиғин ўтказаётгани ҳақида хабар берган эдик. 20-26 апрель кунлари оралиғида ўтказиладиган йиғин давомида Олимхўжаев шогирдлари БАА U-16 ўсмирлар терма жамоасига қарши иккита ўртоқлик учрашувида майдонга тушиши режалаштирилган эди. 22 апрель куни иккала терма жамоа ўзарок илк ўйинда майдонга тушишган ва учрашув БАА U-16 ўсмирлар терма жамоасининг 2:0 ҳисобидаги ғалабаси билан якунланган эди. 24 апрель, пайшанба куни, терма жамоалар ўзаро иккинчи ўртоқлик ўйинида майдонга тушишди.

Дубай шаҳрида бўлиб ўтган иккинчи учрашув ҳам анча қизиқарли кечди. Ўйиннинг биринчи бўлимида ўзбекистонлик ўсмирлар ҳисобда олдинга чиқиб олишди ва биринчи бўлим Ўзбекистон ўсмирларининг ғалабаси билан якунига етди. Иккинчи бўлим бошида БАА U-16 ўсмирлари пенальтидан ҳисобни тенглаштиришди. Тенг курашлар остида кечган ўйиннинг сўнгги дақиқаларида амирлик ўсмирлар иккинчи голни киритишди ва ўйин 2:1 ҳисобида БАА U-16 ўсмирларининг ғалабаси билан тугади.

Эслатиб ўтамиз, Ўзбекистон U-16 ўсмирлар терма жамоаси шу йилнинг 6-20 сентябрь кунлари Таиланд мамлакати мезбонлик қиладиган U-16 ўсмирлар ўртасидаги Осиё Чемпионатида иштирок этади.

Ўртоқлик учрашуви.
 24 апрель. Дубай.
 БАА (U-16) – Ўзбекистон (U-16) 2:1.