Осиё Кубогига 175 кун қолди. Тим Кэйхиллнинг мусобақадан умиди катта

Яхши биласиз, навбатдаги мусобақа Австралияда бўлиб ўтади. Яқинда Австралия терма жамоасининг етакчиларидан бири Тим Кэйхиллга матбуот вакиллари бир нечта савол билан мурожаат қилишди.

- Сиз учун Осиё Кубоги қандай аҳамиятга эга?
Тим Кэйхилл: “Албатта, кўпчилик қатори мен ҳам турнирда иштирок этишни хоҳлайман. Негаки бу Осиёдаги энг катта футбол мусобақаси ҳисобланади. Мен ҳар доим жисмоний ҳолатимни яхшилаб боришга ҳаракат қилганман. Бу мусобақа мен учун охиргиси бўлиши мумкин, шу боис унда ғалаба қозониш учун бор кучни ишга соламан”.

- Осиё Кубоги Австралия учун қанчалик муҳим?
Тим Кэйхилл: “Мусобақа биринчи марта бизнинг мамлакатда ўтказилади. Бу эса мухлисларга катта қувончни тортиқ этади. Дунё аҳолисининг ярмидан кўпининг нигоҳи бизга қаратилади. Қолаверса, Австралияга Осиёнинг энг кучли терма жамоалари келишади. Ўйлайманки, биз мусобақани юқори савияда ўтказамиз”.

- Мухлисларга нима дея оласиз?
Тим Кэйхилл: “Биз учун ҳамма стадион тўлиши жуда муҳим. Мен чипталар нархи билан танишиб чиқдим. Болаларга 5 доллар, катталарга 15 доллар экан. Бу унчалик қиммат эмас. Агар ўйинларимизда ишқибозлар астойдил қўллаб туришса, мусобақада ғолиб чиқа оламиз. Чунки мухлисларнинг олқиши биз учун ҳамма нарсадан устун”.

Х.Холиқов тайёрлади.