Ориф Маматказин истеъфога чиқарилди, Эдгар Гесс Андижонга келди

“Бухоро” клубига йирик ҳисобда имконият бой берилганидан сўнг раҳбарият мураббийлар штабини янгилашни маъқул топди.

Бунгача вақтинча бош мураббий вазифасини бажариб келган Ориф Маматказин ҳамда дарвозабонлар мураббийи Қобил Олимжонов истеъфога чиқарилди. Тўғри, “Андижон”ни олий лигада қолиш имконияти пасайиб кетган бўлсада, раҳбарият янги мураббий олиб келишга қарор қилди.

Тажрибали мутахассис Эдгар Гесс “Андижон” жамоасига бош мураббий этиб тайинланиш арафасида. Маълумки, Гесс бунгача “Бухоро” жамоасини бошқариб август ойида истеъфога чиқарилганди. Эдгар Яковлевич учун “Андижон” бегона эмас. У 2006 йилги мавсумнинг иккинчи ярми ва 2007 йилнинг биринчи даврасигача андижонликларни бошқарган. Бу мураббийнинг қўл остида жамоамиз ёмон ўйин кўрсатмаганини мухлислар яхши билишади. Орадан маълум вақт ўтиб Гесс “Андижон”га қайтмоқда. Кеча куннинг иккинчи ярмида мураббий Андижонга келди. Гесс билан шартнома тузилгач, мураббий ишга киришади. Эдгар Яковлевичдан ташқари клуб қароргоҳига Олег Тюлькин ва Виталий Легай ҳам ташриф буюришди.

Бир неча йиллардан бери юртимизда фаолият кўрсатиб келаётган Эдгар Гесс илгари “Андижон”дан ташқари “Насаф”, “Шўртан” ва “Бухоро” жамоаларини ҳам бошқарган.