ЎФАда ҳудудий ассоциация раҳбарлари ўртасида ўсмирлар мусобақалари бўйича йиғилиш бўлиб ўтди

Тадбирда 14та ҳудудда фаолият олиб бораётган 1-Вице президентлар ва ҳар бир вилоятнинг олий маҳорат футбол мактабларининг директорлари иштирок этдилар. Кун тартибида, бўлиб ўтган спорт мактаблари лигаси ва яқинлашаётган олий маҳорат мактаблари ўртасидаги мусобақанинг финал босқичи ҳамда вилоят терма жамоалари ўртасидаги Республика чемпионати ҳақида гап борди.

"Ўзбекистон МТЖ кўрсатган ўйин, бизга берилган баҳо бўлди. Тўғри, биз сўнгги 2 йилда амалга оширган ишларимизнинг самарасини 5-6 йилдан кейин кўрамиз. Лекин бари-бир ҳар биримиз бу натижага айбдорлик ҳиссини туйишимиз керак. Биз кейинги фаолиятимизни ҳам шундай давом эттирадиган бўлсак, ЖЧ орзу бўлиб қолаверади. Ҳукумат раҳбарининг сўнгги қарорларидан унумли фойдалана ола билишимиз керак. ЎФА раҳбарияти имкон қадар барча муаммоларингизни ечиб бериш устида иш олиб боряпти. Бундан фойдаланиб қолиш керак", - деди Раҳмиддин Эгамович.


Яқинда якунига етган спорт мактаблари ўртасидаги Республика мусобақаси сўнгги йиллар ичидаги энг яхшиси бўлди деб айтсак муболаға бўлмайди. Ким кучли бўлса, ўша ғалаба қозонди. Авваллари мезбон жамоа қандай йўл билан бўлмасин ғолибликни қўлга киритар эди. 2019 йил мана шундай ҳолат Самарқандда кузатилди ва раҳбарият жамоани жазолади. 2021 йилга келиб бу ишлар анча тоза ва ҳалол ўтди. Мезбон деган тушунча ўз кучини йўқотди. Энди мезбонлар ғалаба қозони учун том маънода кучли бўлиши талаб этилади. Шунга қарамай камчиликлар йўқ эмас. Бу борада Маъмур Саидқосимов гапириб ўтди.

- Республика босқичини ЎФА вакиллари билан ҳамкорликда ташкил қилган ҳудудларга раҳмат айтаман. Лекин ишлашдан тўхтамаслигимиз керак. Кўп вилоятлар дастлабки босқични ўтказмадилар. Номига жамоа юбориб қўйиш билан иш битмайди. Катта-катта вилоят раҳбарисизлар, мураббийларни назорат қилинг, селекция ишларини олиб боринг. Нима учун номига ўтказиб қўясизлар саралаш босқичини. Бунда қандай қилиб истеъдод эгасини аниқлаймиз? БЎСМлар чемпионати яхши ўтгани билан, у ердаги футболчиларнинг сифати қониқарли эмас.

Ундан ташқари ҳар бир вилоят академиялари бўйича тўхталар экан, мутахассис шундай дейди:
- Директор ва унинг ўринбосарлари яхши ойлик олишни биласизлар, нима учун футболчи қандай ўсяпти, нима истеъмол қилмоқда, буни кетидан югурмайсизлар. Айрим вилоят академияларида овқат билан муммо мавжуд. Бундай бўлиши керак эмас, маъсулиятни ҳис қилайлик.

Йиғилиш якунида навбат таклифларга берилди. Таклифлардан энг муҳими, 5887-фармони асосида ҳар бир ҳудудда яратилиши керак бўлган марказлар бўйича ҳеч қандай иш қилинмаганлиги ва ҳукуматнинг ҳокимият кўмагида шу мавзуни кўтариш кераклиги ҳақидагиси бўлди. 14та ҳудуддан фақатгина Фарғона вилоят ФАда марказ мавжуд бўлиб, қолган 13та ҳудуднинг машғулот базаси мавжуд эмас.